***

ХКЬАЗВА ХАБАР


(Уьмуьрдин легьзеяр)
циклдай


Зун, жегьил ч1авар хканваз рик1ел,
Карагиз легьзе, - чеб тир заз мили,
Кас техфизмай, чк1ай хуьруьн рекьяй,
Физва чешмедал, т1вар алай «Зили».


Ингье чешме, кумач пайгар гьал…
Къаншардал ала, сер яз, ц1велин тар.
Кьуьзуь тандал, къацу тир партал
Алаз, бубат я. Атанва гатфар.


Фена, акъвазна ц1велиндаз мукьвал.
Хурал эцигна, къатна хьиз, кьве гъил.
Дериндай къачуз михьи гьава-ял,
Са герен, кьуд пата, за къекъуьрна вил.


Хтана чешмедал, ацукьна цуквал.
Яд къвезвай ч1утхвардик кутуна за гъил.
Туп1арай куьз жезва михьи тир ст1ал,
Латун це акьазва, ван ийиз хъуьтуьл.


Къудгъунна, хиялдик квай, къарагъна зун,
На лугьун ни ят1а жузуна завай:
- Чиг ч1авал тухванван, булахди, рахун,
Я жегьил итим, чагъинда авай?..


Рик1ел хкана, гьа и чешмедал
К1анидаз лагьай зи икьрардин "къал"…
Къумрал, иер ччин авай буьшмеда,
Квар къуна хъфенай тегьвена яргъал.



Чешмейри хуьда к1анибурун сирер,
Шур-шурдин ванцихъ ченеба яз тур.
Вафалувилин эгьдерни кьинер,
Рик1ин сидкьидай лап винеаваз кьур.


Чешмени ц1велинд ава сефил яз,
Амай уьмуьрдин алудиз йикъар.
Атанва зунни чагъинда аваз,
Чиг ч1аварикай хкьазва хабар…


1998. 05.