Мир лагьайла акъудиз къал;
Акьулдин кlвал аскlан хьана.
Иеси кьей са лайк патал,
Итим тlекьей шуван хьана.
Сада,– Зун я дередин хан!
Цел авуна шуькlуь гардан.
Муькуьда вич– гьахъни дуван;
Им вучтин гил заман хьана?
Садбур ава кичlез, зурзаз,
Садбур ава кьулухъ рахаз,
Сад гьиллебаз, сад уюнбаз,
Шкlуртни са аслан хьана.
Лайк авурдазни рехъ тагуз,
Дуьз рахайди ийиз ужуз,
Гьикl жедани йикъалай–къуз
Халкьди гьалар залан хьана.
Вичин мурад цеве кьуна,
Кьвечхелан мез сиве кьуна,
Тежер кlвалах хиве кьуна,
Рифма факъир бугьтан хьана.
Заз акуна авай гъурбат,
Гьайиф дере а ви гьайбат,
Кьуьнтl ийиз ажугъ са бубат
Нукьсан крар дакlан хьана.
Гьиниз фена ягьни намус,
Шарвилидин гапурди мурс
Кьунва лугьуз, акатна фурс
Дамахиз, агъдабан хьана.
Мир лагьайла
© Copyright: Магомед Мирзоев Мирзой, 2020
Свидетельство о публикации №120112606894
Свидетельство о публикации №120112606894
Рецензии