Т1аьххьара кхерч

   Т1ап аьлла, тийна ду чаккхенан кхерчахь,               
   Тийналлийн г1аролле чурташ а хуьттуш...               
   Олхазарш меллаша диека кху кертахь,               
   1ожалло бишийнарш парг1ата буьтуш.               
   
   Кху кертахь хезар дац адамийн доьвнаш,               
   Рицкъ къуьйсурш а хир бац, эвхаза буьйлуш:               
   Г1илкхехь бу "бахархой"- диллина ду коьвнаш,               
   Хилла вас лачкъош ю, шайна чохь къуьйлуш.               
   
   Адамийн ойланаш луьтту кху кертахь,               
   Ду1анан ницкъаца хьаадо дегнаш.               
   Йижарий, вежарий дахийша бертахь,               
   Б1аьрг тоха: 1оьхкуш бу, дуьненах хьегнарш!               
   
   Хьаваэхь даьржар ду, кхайкхаман дешнаш:               
   Дайбаьхна юьртара - дуьнене кхача:               
   Тийналлехь, мотт боцуш, лаьттачу кешнаша,               
   Тидаме оьцур со - рог1ера "хьаша"...