Аьхюб сумчир

   (Махъв)
Сиварин кьялаъ,
Лап мучIу яквраъ
Гъуншдиъ гъахьну шул,      
Жанаварна сул.
Саб - кьаби аьнтар-
Ахмакьуб, кафтар.
Хъа тму- аьмалдар-
Азгъун, аьяндар.

Сад йигъан азгар,
Гъитну чан начар,
Гъябгъюр жанавар,
Хулазди сулан.
Гъапи: «Йиз бализ,
Магьа шубуд йис,
Кьабул ву яв риш.
Разивал тувиш,
АпIурхьа сумчир.
Бахтлу шул юкIвар,
Ап1ур чпин мадар,
Шулу уткандар,
Биц1и жанаврар».
Хъа сулу: «Фйир, фйир?
Аллагьдиз хатур...
Гьардин кьисмат ву.
Риш вуда бицIир,
Сумчир ухди ву.
Бай вуяв фицир?
Дарш, йипа, якьин,
Гъуллугъчи вуйин?»
Хъа арайилан,
АпIруси рихшанд:
«Бай вуш яв кIубан,
Йип, дарапIди кьан,
Лишнар кирчруган
Пул дипруш фукьан...
Хуз шулин балхьан
Гъизилин тIублан?
Сул-шураз ургам?
Ачухъ апIин сир,
Аьхюб вуш сумчир
АпIури шабшар,
Фужар вуш кьавлар,
Швнур шул яв хялар?
Кидибт, хъасинган,
Фу ипIруб шулуш-
Гъарма, даршиш аш
Устлихъ сумчарган?»
Жанавриз кафтар,
Сулан суалар
Гъахьиб гъагъидар,
Ашкар гъапIундар…
«Якъ хурза сив’ан,
Гъазра саб гъул’ан.
Хъа пул, якьинди,
Бисарза буржназ,
Дихъур тувру кас».
«Дици вуш гъунши,
Дупну саб «Бисми»,
Буржназ пул бис гъи.
Тувну садакьа,
Дюз хьуз аьлакьа.
Аьхирки, закур,
Уву йихь гьязур.
Хъа серитI шураз,
ЙибтIну назнази*
Пешкешар хьади,
Гъачай балихъди».
«Фу ккунду шураз?»
Гьерхру явашди,
ГучIур-гучIури
Кафтар жанаври...
«Ккуниб вартIан кIваз   
Шуран, аьхю гъаз» -
КIур сул-дадайи,
ЦIиб ккетIялхъюри....
Хьайиз биябур,   
ДапIну цIиб сабур,
Гъубшну дишлади,
Жанавар хулаз.

Ккивайиз ахсрар,
Кафтар жанавар
АпIури фикрар,
Гьич гъаабхундар.
Хъа гачIнин ухди
Рябкъюр, сивариъ
Лиж а марччарин.
Дубхьну багахьси,
Хабар даршлуси,
ГьитIибкIур гъвандихъ,
Бисур якъран лик…   
Хъа, му арайиъ,
Саб лиж ***ирин
Хъебгну жанаврихъ.
Хъуркьну марччлихънар,
Гъивну тюфенгар.
Гюллйирра куркьдар,
***ирра хъуркьдар,
Якъра бисундар,
Ляхин гъабхьундар.
Гужсуз жанаври,
Гъурхнийи ликар.

Бегьемди бала,
Гъабхьиган ярхла,
Гъябгъюру гъулаз,
Бисуз аьхю гъаз.
Абгуру гъазма.   
Мушваъ пеар а.
Пеарин кьялаъ,   
Бихъуру гъазра.   
Бисруган му гъаз,
Абхъну саб гьарай.
Ва, даахну ай
Ебхьуру бабаз.   
Бабу тувру маргъ,
Жанаврин кIуллан,
Хъасин юкьвналан,
Гьациб шул фигъан…

ЧIюрхюри ликар,
ДячIягъну палтар,
Дачархьну кьамкьар,
КIул’ин шул зийнар...   
Кафтар жанавар
Хъубкьру чан мукьаз.
ГъапIу аьрз сулаз.
Хъа сулу кIур чаз:
«Гъабхундарва якъ,
Хурза гъапиб накь!
Якъ даршиш, гъазкьан
Хуз шулайив кьан».
Гъапи: «Гъабхьундар!»
«Хъа вуш, баладар,
Сагъ ишри зийнар,
Сумчирра шулдар.
Учуз лазим дар,
Касиб гъавумар…

Галин бализ – галин риш, сивун бализ – сивун риш (халкьдин мисал)…
*назнази – женский шелковый головной платок.