Юбилейдин - бахчадин 40 йис - сценарий

................ райондин
................ лагьай нумрадин аялрин бахчадин
40 йисан юбилейдиз  талукьарнавай мярекат

Сегьнедал музыкадин ванцелди мярекат тухудайбур (ведущие) ва бахчадин аялар экъеч1зава.


Вед.:
Малум я къе виридаз,
Ч1ехидазни гъвеч1идаз
Метлеб вуч я к1ват1 хьунин,
Чаз мугьманар атунин.

Вед.:
Къейдзава къе яхц1ур йис-
Чи бахчадин сувар я,
Ийизвани куьне гьисс:
К1ват1 хьанвайбур дустар я!

Вед.:
Куьн атуй, рагъ атурай
Чи играми мугьманар!               
Буюр, чи зал ац1урай
Агат, багьа инсанар!

Вед.:
Куьн атунал шад я чун,
Мадни сих хьуй араяр.
Бахчадикай гаф лугьуз,
Экъеч1, азиз балаяр.

Аялрин шиирар:

1.Вичин мили нур вегьена,
Заз дак1ардай рагъ хъуьрена,
Фад къарагъна, гьазур хьана
Чи бахчадиз зун атана.

2.Зун бахчадал гьейран я,
Ам аялрин майдан  я,
Пара ина хъсан я,
Вири санал – хизан я.

3.Гузвай тербия къени я,
Диде-бубани рази я,
Яргъал рекьин са гими я,
Вун рик1 алай, чи бахча.

4.Кьвед лагьай я вун чаз к1вал,
Чи аялриз чидач къал,
Хуьзва дуствал, дидед ч1ал,
Вуна, аялрин бахча.

5.Гьик1 чун рольра къугъвада,
Гьик1 шикилар ч1угвада,
Гьик1 чуьвекар храда,
Чирзава чаз бахчада.

6.Дидедин ч1алан гьарфар
Лезги тарих, адетар,
Чирзава чаз бахчада,
Милаим чав рахада.

7.Шииратдин архадин,
Гьам Куьредин-Къубадин
Чи Сулейман бубадин,
Несигьатар чирзава.

8.Маракьлу я ви тарсар -
Са алемдиз барабар,
Гьар са югъ я чаз сувар,
Бахчада авай йикъар.

Вед.: Гила, гьуьрметлу мугьманар, квез чи бахчадин аялрин к1ват1алди….
(ч1аларин автордин ва музыка кхьейдан т1варар лугьун чарасуз я)
«Бахчада авай йикъар» мани тамамарда

Вед.:
Сагърай, гъвеч1и чи дустар,
Гуьгьуьл шадар авурдай
Кьилиз акъатрай къастар
Куь агалкьун къалурдай.

Вед.:
Ч1алахъ я чун къе-пака
Куьн, лифер хьиз цававай,
Жеда рекьера яргъа,
Эквер хьиз, куз къававай.

Вед.:
Амма бахчада хьайи,
Тербияни квез гайи,
Алуддач гьич рик1елай,
Алатдач куьн рекьелай.

Вед.:
Чи аялрин бахчадин
Кьиле ава хьи инсан,
Алакьунар кавхадин,
Пешекар я вич хъсан.
Вед.:
Коллегайрин арада,
Еке гьуьрмет къачунва,
Югъ-йиф зегьмет ч1угвазва,
Бахча вилик кутазва.

Вед.:
Чи бахчадин к1ват1алриз
Гузва фикир ч1ехида.
Чан-рик1 ада аялриз,
Дидеди хьиз ийида.

Вед.:
Исятда квез чи бахчадин кьил (заведиш) ....... вичин рик1ин гафар лугьуда. Буюр, ......, сегьне куьди я.

Вед.:
Чи бахчадихъ ава тарих,
Яхц1ур йиса к1ват1навай,
Агалкьунрихъ я йисар сих,
Легьзеяр я шаднавай….

(Бахчадин уьумуьрдикай туьк1уьрнавай слайдар къалурзава)

Вед.:
Чи аялрин рик1 алайд я
Манийрални кьуьлерал
Бубайрилай чал атайд я,
И девирдин лекьерал.

Вед.:
Вили цава, хьиз а лекьер,
Чамарар гуз къугъвазва.
Хкажнавай виниз гъилер,
Чеб лекьер хьиз аквазва.

(Аялри халкьдин кьуьл тамамарзава)

Вед.: Алай вахтунда бахчада зегьмет ч1угвазвай коллективди чпелай вилик и бахчада к1валахай пешекаррин рехъ давамарзава: абуру бахчада кутур адетар дикъетдивди хуьзва. Сифтегьан коллективдин векилар чи бахчадиз лап жегьилар яз атайди тир. Абурукай бязибуру чпин вири уьмуьрда анжах и бахчада к1валахнай, гила абур пенсияда ава. Чун зегьметдин ветеранрикай рахазва. Къе абур чи мугьманар я.
Вед.:
Шумуд аЯлдиз чан-рик1 ийиз,
Гъил гъилеваз къекъвена;
Шумуд аЯлдин рик1яй рик1из,
Куьне муькъвер вегьена?

Вед.:
Шумуд аялдиз, хайидаз хьиз,
Уьмуьрдин рехъ туьк1уьрна;
Тербия гуз, Данкоди хьиз,
Рик1е умуд куьк1уьрна.

Вед.:
Галатун вуч я, чин тийиз,
Куьне зегьмет ч1угуна,
Халкьдин арада, рик1 михьиз,
Аферин квез къачуна.

 Вед.:
Гьуьрметлу зегьметдин ветеранар! Рик1ин сидкьидай чна квез чухсагъул лугьузва! Яргъи уьмуьрар, сагъвал гурай квез, куь хзанар бахтлу хьурай.
 Гила квевай т1алабзава, чи патай и гъвеч1и, амма михьи рик1елди гьазурнавай, савкьватар кьабулун.
(Ветеранриз савкьватар гузва)

Вед.:
Вири райондин бахчайриз,
Гузва куьне  къиметар,
Хьун патал къулай балайриз! -
Ч1угвазава зегьметар…

Къе межлисдиз атанва куьн-
Жедайбур шад рекьер хьуй!
Гьар са кардик кутазвай къуьн,
Квез сагъвал, шад рик1ер гуй.
(гила чна гаф райондин образованиедин отделдин кьилин векилдиз гузва.Буюр!)

Вед.:
Чун бахтлу я авай дустар:
Дуст хьун ч1ехи девлет я.
Ихьтин юкъуз лугьун тостар -
Дуст дустуниз гьуьрмет я.
Чна гаф … (бахчадин дустарин векилриз) гузва.

Вед.: Аялрин тербиячи лагьайла чи вилерикай милаим хесетрин, чина хъвер авай, гъиляй гьар са кар къведай, гьакъисагъ зегьметдал рик1 алай, аялар к1андай, абурун гуьгьуьлрикай кьаз чидай инсандин шикил карагзава. Рик1ивайни, бахчайра к1валахзавай инсанар - кьет1ен инсанар я лагьайт1а, чун ягъалмиш жедач. Абуру биц1екриз чпин рик1ин чимивал, дерин чирвилер, уьмуьрдин тарсар гузва. Баркалла аялрин тербиячийриз!!!
 Къе чи мярекатдал аялриз тербия гунин рекьяй машгьур хьанвай, диде-бубадин патай ч1ехи «аферин» къачунвай бахчадин виридлай хъсан пешекариз сегьнедал эверна ва абуруз гьуьрметдин чарар (грамотаяр) гуз к1анзава. Ша, чна гурлу капаралди а ксарин т1варар кьан!
(виридлай хъсан аялрин тербиячийрин т1варар кьазва, сегьнедал эверзава, грамотаяр гузва, цуькверин к1унч1ар бахшзава)

Вед.: Виридлай хъсан тербиячи хьун патал, аялрихъ галаз к1валах ийиз лап жегьил ч1авалай гат1унна к1анда. И карда дерин чирвилер, са шумуд патахъай алакьунар яни манияр лугьун, кьуьлер авун чир хьана к1анда. Гьа ик1а йис йисандавай жегьилдикай камаллуни жеда. Исятда квез чи бахчадин жегьил тербиячийри манидиз яб гун теклифзава.
(жегьил тербиячийри - воспитателри - мани лугьузва)

Вед.:

Къулай шарт1ар авай бахча
Рази я хьун диде-буба,
Баркалла квез лугьуз абур,
Атана я фадлай гьазур.

(Гаф гузва диде-бубайрин векилриз)

Вед.: Чун генани хьурай мукьва,
          Хатур-гьуьрмет аваз пара,
          Куь балайри динжрай рик1ер
          Къенибур хьуй абрун рекьер.

Вед.:
Шумудни са къейдиз сувар,
Мукьвал-мукьвал к1ват1 хьуй дустар.
Куьн чаз мугьман, чун куьниз къвез,
Гуьруьшар хьуй лугьуз-хъуьрез….

Вед.: Акваз-такваз акъатна вахт-
         Чими гуьруьш хьун я са бахт.
          Сагърай вири атай дустар!
          Гьайиф, куьтягь жез чи сувар…