***

ЖАЛГЪАН   ДАГЪ               

Ви буй-бухах ят1ан аск1ан,
Такабур я кьаскьандин кьил.
Гьалзават1ан дагъдин девран,               
Сейлини я  вун алай чил.

Пай ава ваз экуь, рагъул,    
Мич1и тав квай циферикай.
Кьуьд атайла, сифте къвайи,
Дуьм лацу тир живерикай.

Гатфариз, вал алай абур,
Желб ийирвал, я хуп1 т1арам!
Къацу ранг квай, тахуй хатур,
Тандал алай, чухва я там.    

Ацукьнавай, к1вачер къатна,
Агьилдин ухшар я акун.
Ухьт  алудиз  ийизва на,               
Касрин гьуьлухъ галаз рахун.

«Нерран» к1еле, хурудаллай,               
Акун  адан  авай кесер,
Гьакал на гарданда тунвай -
Тефин патал вал бед незер.

Ценцик галай къадим шегьер,
Хас шегьер я талукьриз.
Ам арадал атай тегьер,
Аянарна на махлукьриз.

Меслят хьана, вални гьуьлел,
Шегьер хьана  чкадал дар.               
Къванцин къаяб паруд къене,               
Галай вичихъ гегьенш кьве вар...

Гуьт1уь  хьайи шегьерд чка,
Къулайвилин авай бине:
Карванар къвез, ийиз савда,
Авсиятда  кефер, кьибле.

Шегьердинни хьана нишан -
Шиш  бармак авуна алук1,
Рекъе хьана наши карван,
Лап яргъарай акваз ви к1ук1.               

И маканар машгьурна на,
Ягъийризни хьана «сейли»…
Махлукьри  Дарбанд лагьана,               
Талукьри  Кьвевар, Цали...

Къужахдамай имаратар -
Аманатар  чав агакьай!
Кьац1-хер хьанвай паруд цлар,-               
Шегьер, пайгар, хуьз алакьай!

Шумуд заман, шумуд девран
Акуна ваз,- кума чилик.
Вакъиайрин чизва ваз сан,-
Гьар садан вун хьанва шерик.

Къе, гьуьжетрин,чкизва ван…             
Чизвач чпиз къекъвезва куьк.
Тарихдикни кутаз нукьсан,
Алахънава кхьиз кьуьруьк.

Дувул чирун патал дегьне,   
Къванце акъаз жезва татаб…               
Фашалвили гъизва леке …               
Гьакъикъатдин – авач жаваб!               

Шегьер - к1еле хъийизма чир,-
Чизвач яшар, гьикьван я хас.
Хуьзва  вуна  йисарин сир,
Тирвиляй вун  шагьид асас…

Жалгъадални  алайвиляй,
Т1варни эцигна вал Жалгъан.   
Шегьер, к1еле галайвиляй,
Эгьли - халкьариз я  масан!      
               
2015 йис.  Гьа и  йисуз  Дербент шегьер арадал атайдилай кьулухъ,
2000-йис тамам жезвай кьван…