Чирвални авамвал

Мана: «Лагь: «Сад хьиз жедани кьван (вичин
Раббидикай, гьахъ-диндикай) чирвилер авайбур,
ва чпиз чирвал авачирбур». Къуръан 39:9

Пагь, Чирвилер, куь тIям гьикьван ширин я,
Анжах куьне мукьузда зун Аллагьдиз,
Куьн имандин бине тирди якъин я,
Куьн галачиз, зун ем хьанвай гунагьриз.
…Агь, авамвал, буьркьуь авур вилер зи,
Аллагьди зун ви къармахрай ахкъудна,
Вуч батIул тир на теклифай рекьер ви,
Гьахъвилин рехъ зи рикIивай къакъуднай.
Къведай чIавуз гьар жуьредин суалар,
На кичI кутаз, зи винел пад къачузвай.
Дуьз рекьикай ийидайла хиялар,
На чешне яз инсанар заз къалгьузвай.
Къалур ийиз лацу яз заз чIулавди,
Авамвал, на заз «акьулар» гуз хьана,
ШейтIанди зун кутуна ви ялавдик,
На, авамвал, зун инсафсуз куз хьана.
…Шукур хьайи, Регьимлу тир Аллагьди
Вилерилай мичIи перде алудна,
Чирна хьиз заз кьунвай рекьер гунагьди,
Пуч жезвай зун, къутармишдихъ гахлудна:
Биши хьанвай япариз ван хтана,
Гьахъни батIул гафар гила кьатIузва,
Кьенвай рикIел Къуръанди чан хкана,
Пайгъамбардин (къуй Аллагьдин патай салават ва саламар хьурай вичиз)  геле камар къачузва.
Экв хтана буьркьуь хьанвай вилериз,
Айру жезва чIулавдини лацуди,
Нур чкIана гила вири рекьериз,
Гьиссиз туна чирвал тирди гужлуди.
Агь, авамвал, на тунвай зун суьгьуьрда,
Вун сад лагьай душман я хьи инсандин,
Кьун паталди инсан вичин есирда,
Вун яракь я гъиле авай шейтIандин.
Я Аллагь, На эцигайди дуьз рекьел,
Садавайни жедач анлай алудиз.
Тек са Вун я Твадайди зун дуьз геле,
Вавай жеда зулуматрай акъудиз...