Книга пророка малахии на табасаранском языке

                МАЛАХИЙ ПАЙГЪАМБРИН КИТАБ


                Якув ккун гъахьунзуз, хъа Исав – даккун

Малахий пайгъамбриин,
Раббийи улупу читин хабар гъабхбан гъагъ, алабхъна.

Раббийи, Узу учву ккун гъап1унза, к1ура.
Хъа учву,
фтиинди учу ккун гъап1унва, к1ури гьерхрачва.
Хъа Раббийи, Исав Якувдин гъардаш дарин, к1ура.
Вушра Узу Якув ккун гъап1унза, хъа Исав – даккун.
Дугъан дагълар Узу инсанарихьан ич1и гъап1унза,
хъа саб пай жил чакълариз ккипунза, к1ура.
Эгер Эдомди, учу т1араш дап1начу,
хъа учхьан ич ккидипнайишв таза алап1уз шулчухьан, к1ураш,
Къушмарин Раббийи, дурари дивди, хъа Узу даргъидиза, к1ура.
Дурарин, Раббийин ккудудубк1ру хъял али уьлкейин ччвур,
"пис уьлке" хьибди.
Мициб гьял ичв улариинди рябкъидичвуз ва,
Рабби саб Израилиът1ан машгьур даринхъа, пидичва.

                Раббийин гъуллугънаъ айидарин вижнасузвал
Бали чан адашдин гьюрмат уьбхюри шулу,
лук1ру - чан аьхюрин.
Эгер Узу Адаш вуш,
наан айичв Узухьна вуйи гьюрмат,
эгер Узу Аьхюр вуш,
гьаз Узкан гуч1 ктарчвуз, к1ура Къушмарин РАББИЙИ.
Дугъу мици учвуз к1ура,
Заанурин гъуллугъчйир,
Чан ччвур ул'ан идипнайидариз!
Хъа учву,
учу фици идипна Дугъан ччвур ул'ан,
пидичва.
Йиз гъурбнар ургрушв'инна гъурбан ап1уз
Узуз лайикь даруб хурачва
ва, фтиинди учу Уву асккан ап1ура к1ури гьерхрира ачва.
Хъа фтиинди шул?
Раббийин гъурбнар хрушв
учвуз гьяспикк ккадар!
Заануриз гъурбан вуди
бюркьюб хурачва
ва,
гьамцибра лагьикьуб дарин, курачва.
Му думукьан ч1уруб дарки к1ури,
ликубна иццруб хурачва.
Гъайибхай гьеле дициб ичв аьхюриз,
думу дицибдиин рази шулуш,
дугъу ичв гъуллугъ тамам ап1уруш лигухьахъа,
к1ура Къушмарин Раббийи!
Ич язухъ ап1ин к1ури,
Заануриз ккарагай!
Учву мицдар ап1руган
Думу учвухъ хъпехъуринхъа,
к1ура Къушмарин Раббийи!
Заанурин хулан урнар
учвкан сари хъяркьнийиш ужу хьибдийи,
гьавайиди
Йиз гъурбнар ургрушв'ин
ц1а алди гъитайиз!
Йиз учвухъ юк1в хътариз,
ичв хилари гъабхиб
Узу кьабул ап1идарза,
к1ура Къушмарин раббийи!
Ригъ-гьудубч1вру терефнахъан
тап ригъ-алабхъру терефназкьан,
халкьарин арайиъ Йиз ччвур
зурба ву.
Гьарсаб йишваъ дурари Узуз
ицци ниар адаърудар ургиди,
марцци багъишар хиди,
фицики зурба ву халкьарин арайиъ
Йиз ччвур,
к1ура Къушмарин Раббийи!
Хъа учву Дугъахьна,
Раббийин гъурбнар алишв
марцциб дар,
ва душв'ин алибдиз,
фу ву тму дупну,
ичв даккнишин улупурачва.
Ва дидиз, фициб гъагъишин дарин,
к1урачва,
ва дидихьна
ичв вижнасузвал улупурачва.
Гьамци к1ура Къушмарин Раббийи!
Жарадарихьан тадабгъубна
ликубна, иццруб
Узуз гъурбанди хруган
Узу дициб фици кьабул ап1уру,
к1ура Раббийи!
Чан лижягъ
жили сагъидар гъяди,
Раббийиз гаф тувну хруб
скиш кайиб хураш,
ккадахъидар дицир иблис
балайиккан.
Фицики
Узу вуза кьудратлу Паччагь
ва Йиз ччвурнан улихь
халкьар гук1унди а,
к1ура Къушмарин Раббийи.

                Гъуллугъчйирин улдугнайивал
Гъуллугъчйир,
магьа учвуз Йиз табшуругъ:
эгер учву Узухъ хъпебехъиш,
ва Йиз ччвур адлу дап1ну
ичв к1ваъ идрипиш,
Узу учв’инна бала гьап1диза
ва ичв берекет
агьнакк ккипдиза,
к1ура Кьувватарин Раббийи.
Дюзди гъапиш
Узу дурар гьамуст1анра
агьнакк ккирчназа,
гьаз гъапиш
учву Йиз ччвур адлу ап1уб
ичв к1ваъ ипундарчва.
Учвлантина
Узу ичв вари тухмиз
жаза тивдиза.
Узу ичв машаригъ,
учву гъурбан ап1ру ичв гьяйванатарин нежес
гъябт1дизаячв
ва гьаддихъди сабси
учвура гат1ахьидиза.
Ва Левийин тухмихъди вуйи Йиз йикьрар уьрхбан бадали
Узу учвуз гьамциб табшуругъ тувуб,
хъа аьгъю хьибдичвуз,
к1ура Кьувватарин Раббийи.
Дурарихъди вуйи Йиз йикьрар,
берекетнанна уьмрин йикьрар вуйиз.
Узу думу дурариз
Узуз гьюрмат ап1уз,
Узухьинди гьюрматниинди лигуз
ва Йиз ччвурниин разиди гъузуз
тувуб вуйиз.
Дурарин ушвни'ан
гьякь аьгъювалар удуч1вуйи
ва дурари куч;лар ап1дайи.
Дурар Йиз улихь
берекетнииндина дугъривалиинди
яшамиш гъахьну
ва гизафдар
гунгьарихьан ярхла гъап1ну.
Гъуллугъчийин мелзниин,
адмийир чахьна дуфну аьгъювалар аьгъю ап1бан бадали
Заанурин къанун алди ккунду.
Фицики гъуллугъчи
Кьувватарин Раббийихьан
адмийирихьна гьаънайир ву.
Аммаки
учву дициб рякъхьан
ярхла гъахьунчва,
ва учвкан ктагъу аьгъювалариинди
гизафдар думу рякъхъан хътаунчва.
Левийин тухмихъди вуйи йикьрар
учву гъюч1юргъюнчва,
к1ура Кьувватарин Раббийи.
Гьаддаз
Узу учву биябурвалиъ итунзачву,
вари халкьдин улихь
асккан гъап1унзачву.
Гьаз гъапиш учву Йиз рякъяр
гъюрхюндарчва.
Къанунар
гагь мици, гагь тци
ктитурачва!

                Жара хпар хруб дар
Ихь варидарин Адаш
сар даринхъа?
Ухьу халкь гъап1ур
сар Заанур даринхъа?
Гьаз ихь гъардшар ухьуз
даккунди ву?
Ихь абйирихъди вуйи йикьрарин гирамивал
асккан ап1ури,
гьаз ухьу дурариз
куч1лар ап1ура?
Ягьудайин халкь
вафалуди гъубзундар.
Исраэлиъ ва Ерушалаймдиъ
кфирвалар ахьру.
Ягьудайин адмийири,
жара аллагьариз икрам ап1рурин риш
хпирди гъахну
ва Раббийи ккун дап1анайи Гирамишв
асккан гъап1ну.
Якувдин чадрариан,
учв фуж вушра,
гьеле Кьувватарин Раббийиз гъурбнар хурайир вушра,
гъит дици ап1рур
Раббийи терг ап1ри!
Магьа учву
хъана фу ап1ураш:
Раббийиз гъурбнар хрушв'ин
нивгъар удурзурачва.
Ичв багъишар Дугъу кьабул дарап1руган
ва ичв хру гъурбнариз дилигруган
ишурачва.
Гьаз кьабул ап1урадар ва лигурадар к1ури гьерхиш,
уву яв жигьил вахтна духнайи хпир
масу тувунва!
Думуган Рабби ичв арайиъ
шагьид вуйи.
Думу,
яв гьякьди вуйи хпир,
уьмрин юлдаш,
уву масу тувунва!
Раббийи учву
рюгьнииндира бедендииндира сабди хьуз
сат1и гъап1нийи.
Гьаз гъап1нийихъа сат1и?
Заанурихьан вуйи насил бадали.
Гьаддиз яв рюгь уьбх
ва яв жигьилгандин хпир
масу мутуван.
Хпирихьан жара хьуб
аьгь ап1идарза,
жара ап1рури
чан палатдиина аьрвал хура,
к1ура Кьувватарин Раббийи.
Ичв рюгь уьбхяй,
намусуз махьанай,
к1ура Кьувватарин Раббийи.

                Диван ап1уз Рабби гъиди
Учву ичв гафариинди
Рабби зигар ап1урайидар вучва.
Учу фтиинди зигар ап1ра,
к1ураш,
магьа гьамцдар гафариинди:
ч1уруб ап1рур Раббийиз уччвури рякъюра,
ва хъасин:
наши Думу,
диван ап1ру Заанур,
к1урачва.
Магьа
Узуз рякъ ккабалгуз
Йиз кас гьаъраза.
Ва учву агурайи Регьбер
хабарсузди Чан Хулаз гъиди.
Учву ккилигурайи йикьрарнан Йиз кас
учвухьна сарун магьа гъюра,
к1ура Кьувватарин Раббийи.
Думу гъюру Йигъ
шли аьгь ап1иди?
Дугъан улихь
шлихьан дийигъуз хьибди?
Думу вариб ебц1ру ц1аси
ва марцц ап1ру ч1уру сябунси
гъиди!
Думу, хилар хъиржвну,
арс марцц ап1уз ва ебц1уз хъюгъди.
Дугъу Левитар
гъизилна арс ерц1руси
марцц ап1иди.
Хъа гьадмуган дурари
Заануриз чпин гьякьвал улупбиинди,
багъишар хиди.
Ккудушу йисари,
дягь заманайин йигъари,
Ягьудайи ва Ерушалаймди хури гъахьи гъурбнарси,
дурарин гъурбнар
Раббийиз кьабул хьиди.
Хъа
Узу гъидиза учвухьна диван ап1уз:
Узу ил хътадабгъди
фалчйиризна кьяппйириз,
куч1алди ху ап;рударизна лихрударин кьимат тутруврудариз,
ач1ни хпаризна йитимариз илзигрудариз,
жара йишвлан гъафидар нигь ап1рударизна Узхьан гудруч1рудариз ап1руб айиз,
к1ура Кьувватарин Раббийи.

                Тувну ккуни кьимат
Узу вуза дигиш даршлу Рабби.
Ва гьаддиз учву,
Якувдин наслар,
терг дархьиди гъузну имичва.
Ичв абйирин вахтарихъанмина учву
Узу улупнайи къайдйирихьан
гьудуч1вначва
ва дурар
хъаърадарчва.
Узухьна кьяляхъ хъадаркай,
хъа Узу учвухьинди хътаркидиза,
к1ура Къушмарин Раббийи.
Хъа учву,
фици хътаркуча, к1урачва.
Инсандихьан
Заануринуб гьит1ибк1уз шулинхъа?
Хъа учву Йизуб гьит1ибк1урачва.
Учу Явуб фици гьит1ибк1ура, к1урачва.
Узуз рубкьру йиц1убпи пай,
ва учву Узуз духну ккуни багъишар!
Гьамци ичв вари халкьди
Йизуб гьит1ибк1урачва
ва гьаддиз ичв кьялхъян балара хътабкурадар.
Йиз Хулаъ ип1руб ади хьпан бадали
гьадму йиц1убпи пай
амбарханйириз абкъинай.
Гьеле гьамци
Узу ахтармиш ап1инай,
к1ура Къушмарин Раббийи,
хъа рябкъидичвуз
Узу учвуз заварин улдар арц1дарш
ва ичв'инна эйвал ап1уз даршлубкьан
берекет абхьдарш.
Узу гъитидарза
ичв мягьсулар зиянкрарихьди ит1уз.
Ичв т1умт1ин ширниин
бегьер алдарди хьибдар,
к1ура Къушмарин Раббийи.
Бахтаврар ву пиди учвуз
вари халкьари,
гьаз гъапиш учву
уткан жилиин яшамиш шулачва,
к1ура Кьудратирин Раббийи.

                Гьякьлудариз пешкеш
Учву Йиз терефназди
лайикьсуз гафар ап1урачва,
к1ура Къушмарин Раббийи.
Хъа учву,
Увуз къаршуди учу фу гъапнийи, к1урачва.
Учву,
Раббийиз гъуллугъ ап1уб,
дав ляхин ву, к1урачва.
Фу гъабхьнухъа ухьуз
Дугъан къанунарна къайдйир хъаъра к1ури,
гьаммишан пашман машар гъивну
Дугъан улихь лицура к1ури?
Магьа,
ягь адрударра
бахтаврар ву, к1урачва.
Дурариз Заанурихъди зигурушра
фук1ара гъабхьундар, к1урачва.
Хъа Раббийихьан ул хьади дицрудари
чиб-чпиз гьамци к1ура:
Раббийиз вари ебхьура
ва фикирназ гъадабгъура!
Дугъан улихь ччвурар кайи китаб хьа
ва душвак
Чахьан ул хьади дицрударинкан
ва Чан гьюрмат уьбхрюдарикан бик1ура.
Ари гьадрар Йиздар хьиди,
к1ура Кьувватарин Раббийи.
Йиз гьюкмин Йигъан дурар
Узуз багьади хьидизуз.
Чаз кюмекнаъ гъахьи бализ
адашди фици рягьим ап1ури шулуш,
Узура дурариз рягьимлу хьидиза.
Хъа гьадмуган
учвуз хъана рябкъидичвуз
фициб фаркь'вал аш гьякьлуринна гьякьсузрин,
Заануриз гъуллугъ ап1руринра
дарап1рурин арайиъ.

                Раббийин йигъ
Ухди гъибди Думу Йигъ,
ц1и рабгурайи деринси –
фурслударна писдар
нахъвси хьиди,
гъюз ккайи думу Йигъу дурар
ургиди,
к1ура Къушмарин Раббийи.
Дурарикан фук1ара гъубзидар:
я кюл, я ччив.
Хъа учвуз,
Узуз гьюрмат ап1рудариз,
гьудубч1види гьякь'валин ригъ.
Дидин нурари
хури хьибди сагъ'вал.
Аьхъ'ан адау к1арарси учву
хьидичва гъюркури шадди.
Писдар
ап1идичва ликариккан.
Узу дебккнайи думу Йигъан
дурар ичв ликарикк
биширугси дахьди,
к1ура Къушмарин Раббийи.
Узу Йиз кюмекчи Мошейиз
Хорив (Синай) дагъдиин туву
табшуругъарна къайдйир –
Мошейин къанун –
ичв к1ваъ уьрхяй.
Зурба ва гуч1 шлу
Раббийин Йигъ гъяйиз,
Узу учвухьна
Илья пайгъамбар
гьаъдиза.
Жилиинна Узу гъафиган
дид'ина бала гьадрап1уз
дугъу абйирин юк1вар
чпин веледарихьинди илт1ик1иди.