Б1ЕХА ЗАМА Мустафа Ганижев

         Б1ЕХА ЗАМА           Мустафа Ганижев
       
Хано лур хул массарел ч1оаг1а,
Ха хула кхел. Ха хина кхела.
Цар бу болх хулаш Даьла доаг1а!
Кхелах саг водаш веце вала?
               
Кхела сийдовр да дунен т1а хьагуш,
Цхьанегар дехаш е к1ал хьалхьажа.
Мегардолаш мо лийна, дар хувцаш,
Базар т1а кхачара, саг хул тайжа.

Мелла зама мара ца хилара,
Ха я – Дала янна, болата ха,
К1ай морхаш къег сага сигалара,
Хала мег из корновирус беха.

Саг вала кийча вац, бехквоацаш,
Д1а-юха дула лазар, цун ма  гац,
Цхьа скарлатина да, низ болаш,
Цо-м воажаву саг, бехкбар лахац.

Къа ду зама –  ха б1еха ена,
Аьшка юхь-сибат цунца даьнна.
Х1аьта к1ур баьннаб наьха ц1ена,
Соми бешара х1азилг данна.

Къага ца могаш, хьеж из морхилг,
Цун ца магара лазар дена,
Д1а-х1а дала, меги цун дакъилг?
Саг валар хул, бехкбоацаш лийна.

Ер зама-м я хьона – б1еха ха,
1а-м хье, ираза ма вийцари,
Хьо теркалве, нах боацаш ма ба,
Къадеци шун, молхаш йоацари?

Цхьанена хетар хурдац кхела,
Сталин, Гитлер цхьана бахаш мо –
Китайра вирус денад мела,
Дуне корзаг1доаккхаш хули къу?

Афика е Греци бехке яц,
Лазар денад б1ехачар сага.
Ворх1 шу да, к1аьнка деша водац,
Водар хул набахта, из  мега.   

Яьхкар ханаш, эхь дайна зама,
Соми бешар к1ур сигал бодаш.
К1ега морхилг сага хулар тоама,
Ха хул кхелаца, саг лаотташ*.   

Зама яц, адами дог хьога,
Мархьйолаш хил, сага из магац.
Ха я-кха, – гучадаьнна ц1ока,
Да из дег1а ц1ока, – коч а яц.

Къорга да цуна чухар ма1ан,
Цу хано цхьа тхьамг1а да гойташ.
Барзан кога, лар мо хул бахьан,
Саг бехке веш каша вохийташ.

Дикк хьажал, ва нах цу харцонга!
Из коги лар хьадагаеха.
Кхело «веш бехке» укха денга,
Шайт1ан белха, цун баьча маьха.

Ха я саги вахара, кхел хаьда,
Шайтано ший басардеш, низ хьагойт.
Жи вари, г1алг1ай вай к1езига да,
Сома хилалаш, барта, дин д1агойт!
            Лаотташ* – хало ловш, из д1ахьож; испытывая.
                21. 05. 2020 ш.