Гатфар къвезва,мубаракрай квез и вахт!
Жив цlразва, азад жезва тепеяр.
Кьуд пад гуьрчег,бес тушни им чlехи бахт,
Яр атайла,яда къуьнуьз гьебеяр.
Цавар рахаз,цlайлапанар язава,
Марфар къвазва хуьре,дагъдин синерал.
Дагъдин хурай ятар физва сел хьана,
Катиз-къугъваз мад аялар гъенерал.
Яран сувар атанва чаз цlаяр гваз,
Цавун тагъдиз цlун цlелхемар чкlизва.
Лежбер чуьлдиз экъечlзава яцар гваз,
Чил къарагъриз,куьтен чиле акlизва.
Яран йифиз цавай вацра нурар гуз,
Арабадин элкъвей чарх хьиз аквазва.
Дагъдин хуьряй гагь ара атlуз-атlуз,
Зуьрнедин ван,шаддиз инсан рахазва.
Таран хилел ацукьна билбил рахаз,
Шад жезва,ам,михьи-къайи ятар хъваз.
Цавун тагъда чарх язавай лекь акваз,
Гатфарин югъ акъвазнава дамах гваз.
Яран сувар
© Copyright: Марьям Алискерова, 2020
Свидетельство о публикации №120052002788
Свидетельство о публикации №120052002788
Рецензии