***

ЗАЗ   ЧИДАЧ   

Зи  кьисметдал ацалт хьана кьве девир,
Сад алатна - рик1елай зи алатдач!            
Муькуьд ама – мукьвал туш адан пехир,               
Гьинай атай гъам я,  яраб, заз чидач!

Зи  авсият  дигед галаз т1арам туш,             
Пайнават1ан, аниз хъфин гьарам туш.
Заз часпаррин ат1угъай чин салам туш.
Мус квахьдат1а адан азаб, заз чидач!               

Накъвар къвезва, кузва къарав  вилерин,
Гьайиф ч1угваз, чун пайнавай чилерин!
Аман ат1уз часпард варцел к1вачерин,               
Гьикьван гагьда хугуда  таб, заз чидач.

Хъел къвезва заз, ял бес жезвач нефесдиз,
Хур элкъвезва аслан авай къефесдиз.
Кьве  мекв ац1ай кьадар авай миллетдиз,      
Вучиз авач динжвал са гъаб, заз чидач!

Пайи-паяри ст1уни гузвач заз динжвал.               
Сагъ тир чандик жедайди туш нефинжвал.
Белке ят1а  герек тушир надинжвал? 
Надинжвилихъ кват1а суваб, заз чидач!               

И гьалдикай рахазват1ан туьквена,               
Гьахъ к1аниди, чизва, жедач куьц1ена.
Бат1ул  гьалдал  луьк1вензава  ифена,               
Зи луьк1уьнрик  кват1а гъазаб, заз чидач!               

Ийизват1ан, такьат квачир, луьк1уьн  «буш»,
И часпаррихъ, гьахъ - адалат жерид туш1!
Абурал  алай кьве мурз-тийе  къуьруьд  туш.    
Бес низ лугьун ,  рик1ин гъалаб, заз чидач!

Зи уьмуьрдиз, чидач, гьикьван пай ама.
Чизва, чанда, туьхкъуьр тежер, ц1ай ама.
Кузва хьи зун, зи гьарайдик, гьай амаз.
Я махлукъат,  ян им накьаб*, заз чидач!

Кьве уьлкведи халкь пайнава чидайвал -
Хуьр,  убадай... цацун симер фидайвал.
Къакъат  хьана, куьтягь хьунал гъидайвал. 
Гьик1 кхьин за, хуьдай запаб, заз чидач!               
               
Къейд. *Накьаб – ч1алал къвен тийирди, гъавурда такьадайди(неподатливый)
Нугъатдин гаф я
2018 й.