Рик1елай алудмир
Чир хьухь, цIалцIамди туш уьмуьрдин рекьер,
Ава хкаж хьунар, эвячIун ана,
Шагьвардик верцивал галатIа эгер,
УьцIуьвал, къайивал къведа гуьгъуьна.
КукIушриз акъатун мурад хьиз кьуна
Вач даим винизди ара датIана.
Тек жуван къуватдихъ умуд кутуна
Чешне къалурдайвал дуьня кьатIана!
Кьакьанрай иердиз аквада цавар,
Расалдиз къведа ви цуькверин чIурар,
Лекьери ви патав ахъайда лувар,
Вун патал хъуьреда суварин хурар…
Кьил элкъуьн тавурай амма, кIевиз яхъ!
Пара «зун, зун» лугьуз жемир дамахиз!
Агатдай чIав я им ялтахни, ялахъ,
Уях хьухь ,къекъвемир, архайинди хьиз!
Хиялмир мад за вун яцIара туна,
Канда заз гьар чIавуз авайвал лугьун,
РикIелай алудмир садрани вуна,
А дагъдин винелни са маса дагъ хьун.
© Copyright: Билал Адилов, 2020
Свидетельство о публикации №120050405647
Свидетельство о публикации №120050405647
Рецензии