Лекьрен дагъ

               
Алушта шегьерда  са кьакьан  тепе…
Гьейран я гьикьванни зун  иервилел!
Са лекьни аквазвач  Крымдин  пипIе,
 «Лекьрен дагъ»- тIвар ала вучиз  и чилел ?

Ина  мегъуьн тарар авай са чIавуз,
Сувар хьиз аквадай  кьакьан синелай,
Лекьери дамахдив лув гудай цавуз,
Хкведай, цIар чIугваз гьуьлуьн винелай.

И чилин ксарни лекьер тир, лекьер-
Азадвал,  мердвилив - виридаз чешне!
Пехил тир и дагъдал  дугунар,  кьерер,
Садрани гъидачир лекьвилел    рехне!

Са юкъуз душманри  тарар атIана,
Ягъана  лекьериз сагъ тежер хирер…
Къакъатна гьуьливай чара атIана,
ГьакIан тепедикай дагъ авур лекьер…

Амач, амач ина  лекьер цавара,
Абурун руьгь гала гьавадик амма!
Гила кIвал кутунва  кьакьан   сувара,
Мукварин чкадал   цIакул алама.

Лекьрен къилих кьада адан шарагди,
Аваз  викIегьвилер руьгьда, ниятда-
И пата уьмуьрна пуд кхьирагди,
Гьар сад са лекь хьана эдебиятда!

…Алушта шегьерда  са кьакьан тепе…
Кьиле къекъвез ава залан  суалар,
Зи вилик -ЧIулав гьуьл, ргазвай лепе,
Чатырдагъ  галайнихъ фенва хиялар…

  Крым.Алушта. август 2019.