Вун акуникай
(сонет)
Чи мензил яргъа я, шегьерар чара,
Руьгьер къакъатзавач амма йифни югъ!
Лугьузва вуна заз, белки мукьвара
Чазни кьисмет жеда и хиялрин гуьгъ…
Акурла мукьувай а къамат, а чин,
Деринриз дувул гуз фидатIа тIалар…
Винелай секин тир рикIериз вучин-
Хурар кукIвардатIа, хаз пакун тIвалар?
Чуьнуьхиз алахъда чун вилин накъвар,
Къеняй авахьзавай селлериз вучин?
Чавай лугьуз жеда: ахвар я, ахвар,
ТIупув къалурзавай эллериз вучин?
Фикириз вахъ галаз расал хьуникай,
Вучиз заз кичIезва вун акуникай?
27.07.19.
© Copyright: Билал Адилов, 2020
Свидетельство о публикации №120050208034
Свидетельство о публикации №120050208034
Рецензии