Белки ви руьгь ятIа?

                Бубадин экуь къаматдиз…
Ина гьар камуна ви гелер ава...
АлкIанва  зун гъенел, хиялри чализ…
Къе руьгьда къугъвазва фул гъидай  гьава,
Тухузва яргъариз, гьиссери ялиз...
               
Ингье, им  марварар- аманатар зал,
Икьван иер сортар ваз ни ганвайтIа?
Хуьруьн атир къвезва  шегьердин юкьвал-
Вуна чIурун цуьквер гьинай гъанвайтIа?

Килиг, мад  кьеркь* ала лакарин кьилел,
Са чIавуз гьа вуна туькIуьрнавай хьиз.
«Герек я къацубур хьун жуван чилел»-
Сефил я, ви гафар гьа рикIел хкиз......

Тегьенгрин гуьгъуьна  фенай гьевесдив,
Кагьулвал тавуна Гьачаталадиз**…
ЦипIицIри чим гузва заз ви   нефесдив,
Рахазва  милидиз тандик   гатадиз…

Рахазва заз вакай… «ФЗУ»*** куьтягьна
Бакуда квалахик акатуникай,
Ви шикил устIарриз чешне хкягъна
 «Правда» газетдиз акъатуникай.
 
Лугьузвач бес вучиз  гьикI гъвечIизамаз,
Етим амукьнатIа вун  вахан гине …
Дяведин йисара азабар чIугваз,
Йикъар акъуднатIа гъамарин къене…

 
Садра  вуна цайи ичин тарари
Лап гатун цикIизни гузва серинвал,-
Амма ихтилатрин, хъвазвай чаярин,
Амач а тIямар, амач ширинвал…
 
…Ина гьар камуна ви гелер ава…
АлкIанва  зун гъенел, хиялри чализ…
Япарихъ са  мили  ван галукьзава -
Белки ви руьгь ятIа…хтанвай кIвализ?

                Б.А.    03.02.2020
*кьеркь- Ст1ур нугъатда  полиэтилендикай авунвай  пленка
**СтIур хуьруьн аранда авай чилер.
***ФЗУ- 50-60-йисара пешедин мектеб .Урус чIалал:фабрично-заводское ученичество.