Галат хьана, югъди бегьем къекъвена,
Суван тlулал ял ягъизва, гелкъвена.
Гъетерикай юлдаш хьайи чубандин
Сирерикай дад хкудда мугьманди.
Яйлахра чай, гьар жуьредин атир квай,
Хаму чандиз дарман я лап хийир квай.
Гьелбет цуьквер, къуьндуькьарни къумбарар:
Экв жедалди бул суьгьбетар, хабарар.
Мукьвал–мукьвал циз бадидай, нуш хьана,
Япунжидихъ агалтнава, хуш хьана.
Багьа мугьман дагъларани савкьват я:
Къаймахни шур, хпен ниси– къамат я.
Йиф яргъи я, гъетер цавуз пай хьана,
Эвичlнава лап мукьув, чи тай хьана.
Рапl–рапl ийиз цlай са бере терс ава,
Йифен тама байкъушарин сес ава.
Чун атунин метлебдикай хабар тир
Чубандин мад кефиярни къумбар тир.
Рахазва ам вичин рикlин гьалдикай,
Дад хкудиз хиялрикай, тlалдикай.
Агалт хьана япунжидихъ мягькемдиз,
Суьгьбетзава чубанди чаз уьтквемдиз.
Багьа мугьман дагъда еке савкьат я
© Copyright: Магомед Мирзоев Мирзой, 2020
Свидетельство о публикации №120042809142
Свидетельство о публикации №120042809142
Рецензии