ЗУН ВУЖ ЯТIА
Са сеферда лагьана за дустуниз:
Зун вуж ятIа, чир жеда, хъел атайла.
СтIал вацI хьиз, муьтIуьгъ хьана къастуниз,
Муькъвер тухуз, аквада сел атайла!
Дуствилелди рахайди – зи мугьман я,
Шадвал ийиз, гьам мехъер, мел атайла,
Кефи хадай, алчах ам зи душман я,
ДамаррайтIуз, рикIиз кIуь кьел атайтIа!
Зунни куьн хьиз, хайи кас я дидеди,
Икрам ийиз, вердиш тир эл атайла.
Галукьайла, ван ийида келледи,
Къажкъан ргаз, цIай къатиз вел атайла!
Амма, за жув акI тухузва, секиндиз,
Хпен патав, нек хъваз кIанз, кIел атайла.
Ша, зи патав, кьил хкажна, эркиндиз,
Кварарни гваз, чи рушар, цел атайла!
ЗУН ВУЖ ЯТIА
© Copyright: Сажидин Саидгасанов 4, 2020
Свидетельство о публикации №120042210019
Свидетельство о публикации №120042210019
Рецензии