Зегьметлудан рекьикай бустан жеда

Ичин таран эвис хьана хилерай
Тават ичер авахьзава чилерал.

Жаннат багъдин къацу хурал, муг хьана,
Усал гьисер, усал фикир руг хьана,

Хиялар гваз ацукьнава теспягьиз.
Халис хиял къведа кьилиз темягьиз.

Жуван рекье къекъвезвайдаз, уьзягъ яз,
Гьар са жигъир аквада хьи фирягь яз.

Зегьметлудан рекьикай бустан жеда,
Явакьандав югъди са бугьтан жеда.

Гьар са касдиз ачух рикl са абур я,
Зегьер кlватlун четинни я, агъур я.

Жува жуван тариф авун хъсан я:
Хъсанни–пис квахьнавай им заман я.

Язух дуьнья, вуч хийир я пис лугьун,
Хийир туша шайтlандиз иблис лугьун.

Алчахвилер ийизвайди уьзягъ я,
Амукьарди ваз кьуранвай са багъ я.

Кар тавурдан чир жедач я усалвал,
Халис карди къалурда хьи кьегьалвал.

Гьар мураддихъ ава вичин кьадарни,
Кар тавурдакай хьанач я устlарни.

Хийирдин затl тlимил хьунухь хата туш,
Гъалатlарни пара хьайид уста туш.

Лазим тушир карди эхир усал я,
Хийирдин зегьмет виридаз гьалал я.

Чаз гьалал хьуй чи зегьметар гьамиша,
Гуьгьуьл тахьуй чи садрани перишан.