Ер мугIараш аз язду Дзейтова Лейлайна хетадаь

Дукха мискаш ба вай мехка,
ДегIа могашал во йолаш.
Царга хьажар, тIа да, мехка,
Къахьега деза вай ца дохаш.
Царна юкъе ба заIапхой,
Маьже йоацаш, лела цалуш.
Фу дергда царна ва мехкахой?
Овтта деза вай ца дохаш.
Цу мискашта бIарахьежаш,
ДагIар нийса вай хургдац!
Из дIалаца хьакъал доацаш,
Вайна юкъе саг хургвац!
Лейла хьо я даггара болх беш
Тахан оах из дика кхетаду,
Хье а яц хьо дика могаш,
Унахой бала Iа кхетабу.
Дала хержа, хьайна лайна,
Хьо цу гIулакха хьалхаяьлар.
Хала дале а, хьайна лайна,
БIарчча фонд Iа хьайийлар.
Диъ шу даьннад болх болабаь,
Дукхане дегаш Iа хьаьстад.
Наьха хьашташ хьакхоачашдаь,
Iа-м хьай дог а дIаденнад.
Къе-миска волчун, воацачун могаш,
ГIулакх деш хьо кхесташ я.
Наьха оамал керда йохаш.
Берий дегаш хьесташ я.
Доахаш сийрда баьде вахар!
Iа хьега къа дорг ма дац.
Даьла духьа вай хьа ца даьр
Кхоана вайна корадергдац!
Баркал чIоагIа оал хьона наха.
Дала баркал алда хьона!
Шоай дезалхо лоархI хьох наха.
Дала морзо лойла хьона!
Ди тIехьа, керда фондаш ехкаш,
Цу гIулакха зама хьайзай.
Бакъда хьалхар гIа дIабоаккхаш.
Хьо массаза хьалаьттай!
Яхийла хьо укх дунен чу,
Дог гIоздувлаш, товр хулаш,
Яхийла хьо укх дунен чу,
Хьай Iаьхарте Iалашъеш.

Матенаькъан Илез