Джюрек бла ушакъ

ДЖЮРЕК БЛА УШАКЪ
Тебуланы Шукур

 

   Быйылгъы джазны келгени ары деричилеге ушамады. Кюн тие да, джабалакъ тёге келди ол. Ары деричин джюрюген джолум да башха кёрюнеди. Ол къой эсенг, джюрегим да башха тюрлю тебеди.
     – Кюн ашхы болсун.
     – Ашхылыкъ кёр.
     – Джюрек, башха, сёз айтхан болмады шойду да? Чарсха чабханча тыпырдадынг. Биринчи кереми тюбешебиз джолда ол тиширыу бла мен. Кюн сайын тюбей тургъан адамны кёрюб, алай нек джангырдынг.
     – Адам, сен бу джол тиширыуну кёзлерин кёрмедингми? Мен джюрек болуб сезгенни, сени кёзлеринг кёрелмадыла, не?
     – Бизде намыс, адеб деген барды джюрек. Толу тюбеб, салам бергинчин башладынг тыпырдаб.
     – Ой, эмина джетмезлик, алгъын алай этмеучен эдинг да. Джашлыкъдан чыкъгъанымда да тыпырдагъанынг бурунча турады. Джазгъы кюн джолунга сюймеклик бурчагъын себмеди эсе. Назму джазарча, къолума къачан къалам алгъанымы унутхан эдим. Биягъы сен башлатдынг.

Салкъын джуртха джарыкъ тёге кюн тийгенча,
Джюрегиме сезим джырны салдынг сен.
Джыр фахмусун эшитдирирча джырлайд джюрек,
Учунуу джырчылагъа болуб тенг...

     – Ой, къайран джюрек, бир сен сезгенни саулай дуния билсе излейсе, бирде билгенинги кесингден джашыраса. Бу неди, не? Джашлыкъмы къайтханды сеннге, огъесе?..
     – Адам, тохта, келе турады.
     – Келсе – саламым хазырды.
     – Саламны къой да бир башха сёзню башла.
     – Мен сенича тыпырдаялмайма бу ишде. Меннге сёз башла демей, джюрекден джюрекге салам берсенг а?
 – Сен билген меннге ийнар мурулдатхан, назмула джаздыргъан. Назму джазылмаса, уллу ишинг къалгъанча кюрешесе.
     – Сен адамса. Джазарынг келмей эсе, накъырда бла айт. Мени тилим болса, тыпырдарыкъ тюйюл эдим. Айтыргъа уяла эсенг сезиминги, мени атымдан джаз да, барма къой назмуланы.

Кече, кюн да джюрек сени сагъынады.
Энд тюбешсек сёзюн айтыр умутда,
Джылыу берген кёзлеринги сакълайма мен,
Биз джюрюучю орамчыкъны унутма.

     – Не зат?! Джаз деб джаздырыб, энди джырт дейсе.
Хайыр.
Керек тюйюл эсе къойдум. Сенсе мени джукъусуз, умутлу этиб джашатхан. Керти джюрек къуш къанатын къакъгъынчы, айтырын айтдырыб, башханы джюрегин да кесиникича этеди.
     – Манга гурушха этме да, адам, мен тыпырдагъан заманда, аны сёзлеге кёчюрюб ангылата бил.
     – Мени алай этдирлик, джюрек, сен тюлмюсе?
     Алгъын экибиз бир-бирибизни ангылаб джашай эдик. Сен таукел болсанг,  Аппа билген тыбына дегенлей, бир затны айтыбмы турлукъ эдик  ангылашынмай. Бир джаз дейсе, бир аны джырт дейсе. Хайыр, сен тюз болурса, джюрек, ким биледи? Сен бир джанына, акъылым бир джанына тартады. Къалай этейим?
     Ол тиширыуну да, менича, юйдегиси, сабийлери. Сен не дейсе, акъыл не дейди. Экигиз да менибласыз. Не къычырыкъ этейим, къалай этейим? Къайры элтесе? Сен сюйюб, мен инджилиб къалай джашайым?
     – Мени сейирсиндиргенинг, адам, акъылым бир джанындан дегенингди. Акъылы бла сюйген эшитгенмисе сен? Акъыл ачха санагъан джерге барсын. Мен сени джюрегингме. Мен айтхан болмаса, сенде тынчлыкъ болмазына ийнан.
     – Сен айтхан болуб барыргъа неге керекди? Къушну къанатмы элтеди, къанатны къушму къакъдырады? Ала да мени бла сеничадыла.
     – Адам, келише башладынг. Бири-бирсиз болургъа амал джокъду. Мындан арысын алай джашай барайыкъ. Сюймекликге джазылгъанны зараны джокъду, ариу юйдегиси бар эсе да. Сени кёрген заманында артыкъ насыблы эсе уа. Мени ишим... Мени ишим - сезим бергенди, сеники – джукъусуз кечелени сынаб, кертисин ангылагъанды. Алай эсе, энди да мен айтханны, сездиргенни джаз:

Сеннге атайма энди келлик кюнлерими.
Сен ачдырдынг джюрегими джарыкъ тангнга,
Джашауунгу гюл бачхасы болайым мен.
Мен болайым джер насыбынг, джаным, санга.
 
   – Джюрек, энди уа не болду сеннге? Алгъаракъда бу тизгинни  башхаракъ джаздыргъан эдинг?
     – Адам, сезим бир болгъанлыкъгъа, хар джол сайын башха тюрде келеди. Аны ючюн дейдиле анга сезим.  Мен билдирдим джюрек халда, сен, адамча, сюзе бил кесинг.
Сау бол, мени эсгергенинг ючюн.  Мен сеннге аманны излемейме. Сюйюлген адам билсе, къалса да, сен сюе бил. Сюймеклик кёрюнмей къалмайды.  Ол сени нюрюнг, насыбынгды. Сау бол, ангылаб ышаргъанынг ючюн, адам.
     – Джюрек, сен да сау бол, мени джашауда сюймеклик бла бирге элтгенинг ючюн. Энди да, нелляй бир джазны бирге болурбуз! Сен джангы халда тюбей, мен да берген сезиминге къууана. Къуш къанаты керек джерге элтгенча, сен сюер джерге чакъыраса. Биз бирге болгъан заманнга – джашау дейдиле.
 – Адам, бош джашау тюл, сюймеклиги болгъан ариу джашау.
 – Сау бол, джюрек.
 – Сен да сау бол, адам, мени ангылагъанынг ючюн. Сюймеклик назмула, джашауну ариу джашар ючюн керекдиле. Мен бир эки тизгин айтайым, джазамыса?
  – Джазама.
 Биз экибиз джерге тюшген эки тамчы...
  – Джаз, адам. Джазгъан, сюйген да эт. Алай болса, джерни юсюнде эм насыблы сенсе.