Плач иеремии на табасаранском языке еремийин ишал

ЕРЕМИЙИН ИШАЛ


Пагь дердер!
Фици ич1и гъабхьундарин
адмийири абц1найи меркез!
Ач1ни гъабхьну думу –
халкьарин паччагь-ханум.
Йишвар-жиларин аьхюрикан
гьамус дубхьна лук1.

Йишван муч1ушнаъ думу ибшура,
нивгъар жаргъура гарц1ларилан.
Сарира думу ккабцидар,
фила-вуш учв ккунди гъахьидари.
Дугъан дустар хабарсузди алархьрудар ву,
дугъаз дурарикан духьна душмнар.

Ягьудия ут1убккна,
баланаъ а думу, гъагъи – лук1'валиъ.
Жарадаригъ юхсузди гъя,
ва дидиз архаинвал адар.
Душмнар Ягьудияйиъ архьна,
дердери дидин хъч1юкьюра гъухар.

Сиондин рякъяр гъамлу духьна:
машквраз гъягъюз ужур адар.
Ерусалимдин урнаригъ адми гъядар,
Къанундин гъуллугъчйирин ерхьура агьузар,
шубари ап1ура ч1игъар аьзабарихьан!

Сиондин ву дерд!
Дуст дарури думу ккабгъна,
душмнари гъалиб хьпан шадлугъар ап1ура:
Раббийи меркез аьзабариз кадабт1на,
лайикьлуди – дидин вари гунгьариз.
Дугъан биц1идар йисирарди
душмнари хъаъну гъяра.

Чан успагьивал гъудубгну
Сиондин шуру.
Дидин везирар миршарси ву
ип1ру йишв дибрихъу.
Жаргъура дурар кьувватнахъан гъяри
хюрчабан рягьятди хъуркьра дурарихъ.

Гьамус к1ваин ап1ура меркезди,
учв гьавазурди либцурайи кьут1кьал йигъари
вариб багьа вуйибдикан,
мугагьназ чан хилиъ ади гъабши.
Душмнари дидин халкь ккабгъна,
шли дидиз ап1иди кюмек?
Лигура душмнар дидиз,
аьлхъюра дидин кьувватсузвалиин.

Гунгьар, гунгьар ап1ури гъабхьну меркезди,
гьаддиз чиркин дап1на гьамус.
Шли думу адлу гъап1нуш, гьамус гьясбикк ап1урадар,
дидин аьйибназ лигура думу.
Магьа думу ибшура,
кьял илбицна диди,
канч1ар дидин кац1на кфирвали.

Фикриъкьан адайи дидин улубкьру кьаза,
гьаддиз сабдупну думу абхъну,
ва сарира думу ккабцидар!
– Я Рабби! Лигава йиз бедбахтвализ,
фици душмнари гешт хъап;радарин!

Душмнин хилариъ а
дидиз багьа вуйиб вари.
Рябкъюра дидиз: Гирамишваъ
уч1вра адмийир,
Уву гъадагъа гъап1дар,
Яв мажлиснаъ хьуз.

Дидин халкьди гьарай-завур ап1ура
абгура ип1уз ужуб
ип1рубдихъ вариб тувуз гьязур ву,
анжагъ уьмур уьбхбан бадали.
– Я Рабби! Лигава
узу фици беябур духьнаш!

Эй рякъюъ айидар! Учву гъвалхьантина гъудуч1вурачва,
аммаки лигай, рябкъюб гат1абхьай,
аян-хъа уз'ин алабхъу аьзабт1ан аьхюб?
Раббийи алап1ну думу уз'ин
хъял алдабгъру йигъан!

Аьршариан Дугъу ц1а гьап1ну,
убгура диди йиз беден!
чулар узуз ккирчна,
гьергуз узухьди гъитна.
Гъах хьуз пис аьламатнахьан гъитра,
йигъ гъабхьибкьан удубзурайиз ифи.

Йиз гунгьар Дугъу узуз юркквгъариз илт1ик1ну,
Дугъу Чан хлиинди дурар гъап1ну гьязур.
Йиз гардниз дурари илзигура,
дурарикк алдакураза кьувватсуз духьну.
Раббийи узу тувназу
шлин хиларигъян узхьан гъют1урччвуз даршлу!

Узуъ вари кьувватлуйир
Раббийи ликт1илан илдитуру!
Узуз къарщуди, машквразси душмнариз дих дап1на,
йиз жигьилар дурари пуч ап1бан бадали.
Сиондин риш Раббийи ликариккан гъап1ну,
т1умт1ар чяхриз ликкарикк чвурхьруганси!

Магьа гьаз узу ишураш,
улариан нирарси нивгъар рузурайиз.
Наан а йиз, узу ккарцрур,
аьжаликкан ккадаърур?
Йиз биц1идар йихура,
йиз душмнар кьувватнаъ а!

Сионди хилар гьач1арккура,
хъа шли думу ккарциди?
Раббийи буйругъ туву – ва душмнари
Якьуб кьялаъ т1ау.
Дурарин арайиъ Ерусалим –
аьйиб илипу дишагьлиси а!

– Хъа Раббийи дугъриди суд ап1уру,
Хъа узу Дугъаз мют1югълуди гъахьунза!
Хъебехъай, халкьар, лигай
йиз аьзабариз
баярна шубар
йисирарди гъахура.

Йиз ашнийириз кюмекназ дих ап1ури гъахьунза,
аммаки дурари узу масу тувну.
гирами-гъуллугъчйирна кьабидар
шагьриъ йихура!
Уьлин кьац1 абгури гъюч1вна,
аьжаликкан ккут1урччвуз чарйир агури.

Лигава Рабби узуз фукьан гъагъиди аш,
фун кебгънайиз,
юк1в ккибицнайиз.
Узу увуз мют1югълуди гъахьундарза!
Кючейиъ ханжли биц1идар пуч ап1ура,
хулариз аьжал ккилибгура!

Душмнариз ерхьура йиз угьнар,
сарира узу ккарцидар!
Хъпехъура душмнар узу фици аьзабнаъ аш,
Уву гъап1убдиин дурар шад духьна:
Уву улупнайи йигъ гъафну!
Амма гъит дураризра ибшри узуз гъабшиб!

Лиг дурарин вари писвалриз,
дурариз инсаф мап1ан,
Уву узуз инсаф дарап1руганси,
йиз кфир т1улариз дилигну!
Гьей, йиз агьузарин гьисаб адар,
к1ваан ифи удубзурайиз!

Агь дерд! Раббийик хъял ка,
муч1ушну ккаъна Сиондин риш!
Иипну аьршариан жилиинна
Израилин ад.
Гьяйиф гъап1ундар хъял алдабгъру йигъан
Чан ликариккишв!

Т1анкь гъап1ну РАББИЙИ гьяйиф дарди
Якьубдин ужагъ.
Чак хъял кайиган гъадаргъну
Ягьудайин ижмишнар.
Чиркин гъап1ну, жилиинна илдипну
паччагь ва везирар.

Чархьури гъахьну Дугъу, хъял убхьурайири,
Израилин кьувват.
Дугъан хил гъубзну дюрюхди
душмнарихьан дурар.
Дугъу Якьуб ургура ц1иси,
ва юкьуб тереф ц1и хътип1ура!

Раббийи ч1имриз дизигна, душмнуси,
ханжал дибисна хилиз дустсуздиси.
Вариб пуч гъап1ну
улариз масанди вуйиб!
Улубзну Чан гъизгъинвал ц1аси,
Сиондин шуран ужагъдиин.

Рабби гъахьну душмниз ухшар,
пуч гъап1ну дугъу Израил!
Дугъан багьа ужагъар гъадаргъну,
ккидирчну ижмишвар.
Абц1ну Раббийи Ягьуди уьлке
ишбахьди ва ишларихьди!

Завариъ адап1ну Дугъу Чан гъваъ, багъдиъ пажси,
Чан машгъулатаринишв Дугъу ккидипну!
Дугъан ниятниинди Сиондиин к1ваълан гьархна
машкврар ва султ йигъар.
Хъял кайири нигь гъап1ну Дугъу
паччагь ва Къанундин гъуллугъчи.

Чаз гъап1у гъурбнар ургрушв Дугъу ибичну,
тина гъап1ну гирамишв!
Тувну Раббийи душмнариз
Сиондин ижмишнар.
Гъугъ ипна душмнари Раббийин Хулаъ,
ву гьамус дурарин машквар!

Гьял гъап1ну Раббийи т1анкь ап1уз
Сиондин цалар.
Жилихьди сабси ап1ура,
даргъура эргвал адарди.
Адабт1найи архна цал гьарайниинди ишура,
дерд аьгь дап1ну удубкьурадар!

Урнар дараргъну жилихьди сабси духьна:
Гъидирчну Дугъу, уьч1югъну гъарар!
Паччагьна везирар ут1урккна,
Къанун ебхьурадар.
Ва сарун имдар пайгъамбрариз
Раббийихьан рякъювалар!

Деъна жилиин ккебяхъну
Сиондин кьабидар.
К1улариин алабхьна рюкъ
алабхьна яснан палат.
Ерусалимдин шубар
жилиинна ахьна!

Нивгъариан кур духьназа,
фун кебгънайиз,
юк1в парча-парча шулайиз:
Йиз халкь йибк1ура!
Веледар биц1ирнурар гаш'ан йихура
шагьрин кючйириъ!

Дадйирикан дурари ккун ап1ура:
"Уьл чавай, шид чавай!"
Йихурайидар дахьна майтарси,
шагьрин кючйириъ.
Деебтура дурари рюгь
дадйирин хилариин!

Я Ерусалим! Фу пузавуз,
фтиз ап1узаву ухшар?
Фтихь ттевзаву, фици ккабцузаву,
эй Сиондин риш?
Гьюлси, яв дердра к1ан ккайиб дар,
уву сагъ ап1уз саризра кьувват адар!

Яв пайгъамбрари дебккри гъабхьну
куч1ална тяриф.
Яв гунгьар дурари арайиз адагъури гъахьундар
ва гьаддиз ахьну дурар йисирвалиъ.
Кибхри гъабхьну дурари яв ибарик
куч1ал ва алдатмиш'вал!

Гъвалхьантина гъярайириз уву рякъиди
ва гагь гагьаъ йивиди,
ушв-ушв йивну к1ул т1убччвиди
ва Ерусалимдикан пиди:
"Гьаму вуйин думу шагьур,
варит1ан успагьиб ву к1урайи,
вари дюньяйин шадвал ву к1урайи?!"

Уву рихшад ап1ури аьлхъюра, меркез,
яв душмнар.
Пш-ш-ш ап1ура, сппар илч1игура:
"Учу думу т1анкь гъап1унча!
Магьа думу, учву ккилигурайи йигъ!
Аьхирки думу йигъ учуз гъябкъюнчуз!"

Тамам гъап1ну Раббийи Чан ният
Чав ап1урза к1урайиб Дугъу гъап1ну,
дягьзаманйирианмина дебккнайиб!
Дармадагъин гъап;унву Дугъу инсаф адарди,
гъитну Дугъу ув'ин душмнарихьди рихшанд ап1ури аьлхъюз,
дуст дарудар за гъап1ну!

Раббийиз ккараг вари юк1в хъипну!
Эй Сиондин Шуран цал!
Удурз нивгъарин нирар,
йишвнура йигънура!
Саб дакьикьайиъкьан махьан архаин,
гъит нивгъар хът1ат1арццри!

Гъудужв, ва гьарай ип муч1ушнаъ,
сикин дарди вари йишварди!
Гъит нивгъарихьди юк1в абц1ну ибшри,
гъит Раббийиз думу рябкъри!
Гьач1аркк Дугъахьна хилар,
ккараг яв веледарихъан
гаш'ан йихурайи
вари раццар-кючйириъ!

Улар гат1ахь, лиг узухьинди Рабби!
Шлиз Уву мициб инсафсуз ляхин гъап1унва?
Дадйири ит1ура таза биц1идар,
чпи гъюрхю веледар!
Раббийин Гирамишваъ дийихна
Къанундин гъуллугъчйирна пайгъамбрар!

Жилиин рякъюхъ дахьна
кьабир ва биц1ир!
Йиз шубарна жигьилар
ханжли дийихна.
Хъял алдабгъру йигъан Уву дурар гъийихунва,
инсаф адарди гъурккунва!

Дих гъап1унва пис аьламатариз
варишвариан машквразси.
Фужк1ара Раббийин хъял алдабгъру йигъан
ккадархьундар, ч1ивиди гъузундар.
Узу хилариин илитну гъюрхдар,
душну вари гъирмиш гъап1ну!

Узуз аьгъю гъабхьунзуз,
узу аьгъю гъап1унза дерд!
Чан хъялнан маргълихьди
Дугъу ут1урккури гъахьну узу,
ва муч1ушназ гъахну аквнан тики адру.

Уз'инна хъана, хъана
гьар йигъан Дугъу хил хура!
Йиккна хам йиз гъяч1яргъниз,
йирккар гъюргъниз!
Узу кьялаъ т1аъну,
юкьуб тереф хът1ибк1ну узхъан кьут1кьал аьзаб.

Итну узу муч1ушнаъ аьсрариз,
узу – накьдиъ айи дук1найирси аза!
Илт1ик1ну Думу узлан цалси – удуч1вуз шлубси дар.
Гъийит1ну узу гъагъи вуйи зунжри.

Гьарйир ап1ураза, ишураза, аммаки йиз миннатар
ерхьуз Дугъаз ккунди адар.
Йиз улихь Дугъу цал тикмиш гъап1ну
гъац1аркну йиз рякъяр.
Пис ву думу, шеъси ккеп1найи,
асланси, хюрч уьбхюрайи!

Уьргъюз гъитну Дугъу узу, рякълан илдитну,
сарна сарди гат1ахьну узу гъитну!
Ч1имир алап1ну ва узу дерккну
алап1ну гъивуб кубкьрурди!
Ут1игъну йиз фун'антина
Чан турбайиан адагъу ч1имрар.

Узкан йиз халкьдиз аьлхъюз ужуб мутму дубхьна,
гьарсад йигъан узлан ч1урури улхура!
Ип1руб тувунзуз Дугъу кьут1кьли кьал,
шидди тувунзуз кьут1кьлишин.
К1ек1ел кц1абхури ип1уз гажназ алаунзу,
ушв барти абц1низ.

Йиз уьмур Уву бахтнахъ мягьрум гъап1унва,
гьархунзуз шадваларикан!
Узу гъапунза: "Мягьрум гъахьунза узу йиз кьувватнахъ,
Раббийиинна дубхнайи хъугъвалихъ!"

Уз'ин улубкьу балайикан к1ваин ап1ин,
йиз уьргъюваларикан,
кьут1кьли кьална кьут1кьалвал йиз пай дубхьна!
К1ваин ап1ура йиз гъяну,
к1ваин хура ва узухъди улхура думу.

Хъа магьа узу к1ваз фициб жаваб ап1уруш,
магьа йиз умуд:
"Раббийин масанвал – ккудубк1надар!
Дугъан мани юк1в хъат1абццнадар!
Гьар гвач1инган дурар тазабашт1ан гьудуч1вура!
Зурба ву Яв Гьякьвал!"

Йиз юк1вну гъапну: "Рабби узуз гъурукьу пай вуйиз,
гьаддиз Дугъ'ин йиз хъугъвал ализ!"
Ужур ву Рабби Чаин хъугъвал алириз,
Дугъахьна яракар шлуриз!
Уж'вал хьибди ккебяхъну умуд кади гъузруриз
Раббийи учв уьрхюр к1ури!
Уж'вал хьибди гьацириз
чан гъагъ жигьил вахтнахъанмина гъабхруриз!

Сарна-сарди ккебяхъну деъна,
фицики дугъан гъагъ Раббийихьан ву.
Жилииннакьан ис духьну ккарагура:
"Мумкин ву умуд хъана имишул?"
Йивруриз гарц1ал ккивну,
гьубк1ну аьйиб куч1вубкьна!

Ваъ, аьсрариз к1ури ваъ,
Раббийи нигь дап1надар!
Дерд гьап1ну, Дугъу язухъ зигиди,
Чан зурба вуйи масанвалиинди!
Чан к1ваз иццру ап1ури Дугъу жаза тувра,
адмийиз хьуз ассар!

– Хъа жилиин йисирар
ликриккан ап1урайиган,
дюз дарди суд ап1урайиган
Варит1анзаанурин улихь
Суддиъ адмийиз куч1ал ап1урайиган –
неинки Раббийиз мидкан аьгъдарди айин-хъа?!

Сариз пуб ч1яаьн ву – ва гъапиб тамам шулу –
РАББИ дарин-хъа варибдиин гьюкум Гъабхурайир?
Варит1анзаанурин гафниинди дарин-хъа
шулайи уж'валра улубкьурайи дердра?

Гьациган фтиз угьнар ап1ура ч1ивидари
чпин гунгьариз, дийик1ди, жаза гьадабт1ну к1ури?
Хъюгъдихьа рякъ абгуз
кьяляхъ хътакидихьа Раббийихьна!
Юк1вра хиларра заъдихьа
Первердигарихьна зав'ин али!

Гунгьар ап1ури ухьу гъахьунхьа,
мют1югъ даршули ухьу гъузунхьа,
Уву учлан хил алдабгъури гъахьундарва!
Хъялну Уву гъадагънава, гьут1урккурава,
пуч ап1урава учу инсаф адарди.

Дифарин зиин Уву гьит1ик1унва,
ккарагбар ерхьдарвуз.
Халкьаригъ Уву учу гъидикьюнва,
ул'ан идипнайи бат1ригъ.
Ушв абц1ну учу кч1ягъюз
ич дуст дарудари.

Пис аьламат ва ич1 – магьа ич тупут –
балана йик1увал!
Удурзура нивгъар улариан нирарси:
йиз халкьдин риш йик1ура!
Жаргъура, сикин шуладар нивгъар
уларихьан диришди гъузуз удубкьдар,
сабан Рабби аьршариан дилигкьан гагьди
рябкъидар!

Аьзабнакк кка йиз гъян,
либгуради йиз шагьрин шубариз!
Тахсирсуз ничхрихъси
хюрч хъипна душмни узухъ!
Ч1ивидимиди ич1азди хъигунзуз,
гъванра илипнийи.

Йиз к1ул'ин штар ктикьнийи,
ва узу ч1игъ гъап1за: "Гъак1ну узу!"
Яв ччвурназ дих ап1ураза, Рабби,
гизаф дерин ич1'ан!
Узухъ хъебехъава,
йиз агьузарна ккарагбар
дерерхьди мугъузанава!

Хуб ужу шуйи эгер Уву йиз дихназ "Гьай" к1уйиш!
Ва: "Гуч1 мап1ан" к1ури, жаваб тувуйиш!
Йиз аьрзайиз лигава Рабби,
йиз уьмур кьяляхъ гъадабгъава!

Увуз рякъюравуз, Рабби, узу фтикан хъюлар дап1наш!
Узуз судьяди йихьава!
Увуз рябкъюравуз, йиз душмнарик фици хъял каш,
узкан фу-вуш ап1уз кьаст ади!
Увуз ебхьуравуз, РАББИ, фици узук дурар кялхъраш
узкан фу-вуш ап1уз кьаст ади!

Улхура узлан душмнар,
зивзивар кч1икьура узкан гьар йигъан!
Лигава: дурар деънашра, дийигънашра –
уз'ин аьхъюри, чпиз кьукьар ап1ура!

Тувава, жан РАББИ, дурариз
чпин гъап1у т1улариз дилигну!
Ап1 дурарин юк1вариъ фагьумсузвал,
гьап1 дурариинна Яв агь!
Хъерг дурарихъ, т1анкь ап1ин хъял кмиди!
Ваъ даришри дурар Яв завун к1анакк, Рабби!

Гьей дерд!
Фици йирси гъабхьундарин гъизил,
багьа вуйи гъизилин ранг гъудубгну!
Гирами жавагьирар гьубкьушварихъинди гат1ахьна,
кючйир-раццариъ.

Эй Сиондин багьа баяр!
Вари гъизилин дурар ккайидар вуйи.
Гьамус дурарин кьимат – ругдикан вуйи леген дубхьна,
ругдин гъабарин устайин хъарабхъуб!

Гьей дерд!
Чакъларира чпин курц1лариз нанйир тувру,
убхъуз никкди ац1ру.
Хъа йиз халкьдин риш писур ву,
ич1и чюлиъ зурба пеъси.
Биц1идарин к1вант1ар дициркъну карсна,
гъухригъишв деебццна уьхъруб адарди.
Шинирк1и уьл ккун ап1ура,
аммаки сарира туврадар уркилкьан!

Шли кьукьар ап1ури гъахьнуш мажлисариъ,
гьамус дурар кючейиъ а,– варибдихъ мягьрум гъахьну.
Фуж биц1идихъанмина къириб-жюржюр алабхьури гъахьнуш,
гьамус дугъу гат1ахьнайи гъяргъяр ккидикьура!

Гьей Йиз халкь!
Увуз гьадабт1у жаза гъагъиб ву
Содомдиз туву жазат1ан:
ккадабхъну думу саб гагьди –
адмийин хилари ваъ.

Гъахьнийи яв жигьилар йифт1ан акуди,
никкт1ан лизиди.
Дурарин жанар гьюлин ч1вак1арт1ан аку элвенди вуйи
нур тувуйи дурари сапфирариси.
Гьамус дурар к1ару духьна к1ару гъванси,
гьахъиш дурар аьгъю хьидарвуз!
Йирккарилан дизигна хам,
гарси улубкънайи.

Ханжлихьан аьжал ужу ву
гаш'валиант1ан.
Хут1лиъ рузи адруган,
рюгь удубч1вуру аьзабариъди!

Назук дадйири чпи
чпин веледар урхьура,
биц1идар хурагди духьна –
йиз халкь йибк1ура!
Рабби хъюлу ац1на,
Дугъан гъизгъинвал ккедябхъюрадар.
Сиондиин кабхьну Дугъу ц1а,
фук1а имдарди думу гъубгну!

Фикриъкьан адайи жилин паччгьарин,
дюньяйиин гьюкум гъабхурайидарин,
писди кьут1кьалур
Ерусалимдин урнарихъна гъюр к1ури.

Магьа пайгъамбрарин гунгьарилантина вуйи кьимат,
Къанундин гъуллугъчйирин нягьякьваларилантина вуйи,
удубзури гъахьну дурари Ерусалимдиъ,
гьякьлударин ифи!

Курарси дурар кючйириъ т1ирк1ура,
ифди кац1найидар.
Дурарин палтарик куркьузкьан
саризра ккун хьибдар.

Дурариз ч1игъар ап1ура: "Дургин йихьай, кфир ху йир,
гъарахай, сабдикра мукуркьанай!"
Дурарикан к1ура халкьари:
"Биркар али гъилицнацар!
Ч1ивиди гъитну ккундар дурар!
Чав Раббийи дурарикан гъап1ну гьергруси,
сарун дурариз лигури хьидар!"

Къанундин гъуллугъчйир сарун ул'ан идитна,
инсаф имдар кьабидариз!
– Хъа ич улар зигар духьнайич,
гьаваиди ккилигури гъахьунча кюмекназ!
Ч1вурдарилан лигури гъахьну халкь,
учу дурариз ккилигури гъахьунча учуз кюмекназ гъюр к1ури!

Гьарсаб лик алдабгъушвахь ккеъна,
хул'ан удуч1вуз гуч1урчуз!
Аьжал багахь шула, йигъар гьисаб дап1на!
Магьа думу – ич аьжал!

Душмнар учухъ хъергуйи
завуъ люкьярт1ан тяди.
Хъергуйи дагълариъ,
ич1и чюлиъ ккеъну шуйи!

Ччим кадатнайи Рабби – ич хътабгъурайи ил вуйич.
Дугъу дурар чулиз дидисна!
Хъа учу дугъкан к1ури гъахьунча:
"Дугъан хиликкди халкьарин арайиъ ерлемиш хьидича!"

Шадвалин гьарай идип, машквар хъап1, Эдомдин Риш,
Уц уьлкейиъ яшамиш шулайи!
Амманаки увхьанра гьудубч1видар зах!
Пиян хьидива, яв аьйиб абццдива!

Сиондин риш!
Яв жаза ккудубк1иди,
Дугъу яв ут1урккнайивализ дивди аьхир!

Эдомдин Риш!
Яв гунгьариз Дугъу увуз жаза тувди,
яв нягьякьвалар гъяц1ал ап1иди!

Я Рабби!
Учу к1ваин ап1ина, учуз дурубкьнайи пайнакан!
Лиг гьеле, лиг, фици учу асккан дап1наш!
Ич мутму душмнариз ккубкьна,
хулар к1уруш – жара уьлкйириндариз!
Йитимар вуча, адашдихъ мягьрум гъахьунча,
Дадйир ич ач1ни духьна.
Саб кьюлт1 штухъ пул туврача,
ичди вуйи гак1вларихъ – кьимат.

Ич хярт1ахъ хъяънайири ил хътабгъура,
амандиан идирчначу – ил хътабгъуз мумкинвал адар!
Египетдиз учу хилар гьач1арккури гъахьунча,
Ассирияйикан миннатар ап1ури уьл ккун ап1ури гъахьунча.

Ич абйири гунгьар ап1ури гъахьну! Дурар сарун имдар аьхир –
хъа учу дурарин гунгьарихъан аьзабнаъ ача!
Лук1арикан амрар духьна,
дурарихьан учу уьрхюз хьидар.
Уьл бадали уьмур аьжаликк ккипрача,
алабхъна уч'ин ич1и чюлин ханжал!
Ич хам ц1иин улубкънайиганси аяч,
гаш'вали думу улубкъну.

Аьрваларикк ич хпар Сиондиъ ккаъра,
Ягьудияйин шагьрариъ – ич шубар.
Душмнари ич регьбрар дариз дизигна,
кьабидар гьюрматнахъ мягьрум дап1на.
Жигьилари ахлар хъч1юхюра,
живанари гак1лар хура алдакури.

Шагьрин урнарихъ кьабидар деънадар,
жигьилари мяълийир ап1урадар.
К1ваъ шадвал дубк1на,
мяълийирин дестйир ишлариз илт1ик1на.

Алдабхъну ич к1уллан кунц1!
Дерд ву учуз! Гунгьар ап1ури гъахьунча!
Гьаддиз юк1вариан идибчура ифи,
кут1уршвну улар.
Сион дагъ ич1и гъабхьну,
чакълар душв'ин дицура.

Гьей Рабби!
Аьсрариз Уву паччагьвал ап1урайир вува!
Яв тахт – аьсрариан аьсрариз ву!
Гьаз Уву учу гъитунва?
Гьамкьан вахтнаъ учу к1ваин гьаз ап1урадарва?

Я Рабби!
Учухьди Увухьна кьяляхъ гъюз гъит ва учу гъидича!
Ча учуз хъана мугагьназдин йигъар!
Неинки учу Уву зат мидарди нигь гъап1унна,
ва Яв хъялнан аьхир айиб дарин?!