ПЕШЕ АВА

ПЕШЕ АВА – ВАТАН ХУЬДАЙ КАС ЛУГЬУР

Гзаф ава чи инсанрихъ пешеяр,
Ракь цIурурдай, цIурурдайбуш шуьшеяр.
Амма гьуьрмет авун патал хас лугьур,
Пеше ава – Ватан хуьдай кас лугьур!
Адаз – йифен,
Адаз – йикъан,
Ракь яз – ифей,
КIеви гьулдан,
Мажал авач,
Ял ягъиз!

Гъиле яракь, рикIе кIан хьун Ватандин,
Адан мурад – ислягьвал я инсандин.
Вичин рикIе авай са затI къаст лугьур,
Пеше ава – Ватан хуьдай кас лугьур!
Адаз – я кьуьд,
Адаз – я гад,
Вич яз игит,
КIани гьар сад,
Мажал авач,
Ял ягъиз!

Адахъ авач, гьич артухан темягьвал,
Адаз тек са кIвалах кIан я – ислягьвал!
КIвале – хизан, кас аватIан – свас лугьур,
Пеше ава – Ватан хуьдай кас лугьур!
Беден – лигим,
Чирвал – дерин;
Кас тир лазим,
Ватан ширин,
Мажал авач,
Ял ядай!

Чиле, цава, гьуьлерални къуллугъиз,
Тазвач ада душманрив са шулугъиз!
Чпелни тIвар алай викIегь «Ас» лугьур,
Пеше ава – Ватан хуьдай кас лугьур!
Баркалладин,
Кар рикIеваз;
Афериндин,
Дуьз рекьеваз,
Мажал авач,
Ял ядай!