Къавахдин тар, ваз вучтин ажал хьана,
Акъвазнава пеш алахьна хилерлай?
Билбил рахай тlебиатни лал хьана,
Рагъу хьанва, акурлай эйбежер я.
Са-сад пешер чепелукьди лувар хьиз,
Къугъваз-къугъваз ацукьзава куьлерал.
Эхирдикай, вядедикай хабар хьиз,
Эвичlзавач шуьтlкьвей, кьежей векьерал.
Гагь-гагь пешер, сяй авуна луж гана,
Элкъвез-элкъвез аквада са жуьреда.
Чуплах хьана, къайивили гуж гана,
Етим хьиз тар аквада и береда.
Хата авач, лап мукьвара хуррам яз,
Ашукь хьана мадни вичин хилерал,
Къацу хурал нурар къугъваз, т1арам яз
Мад жеда ам, галукьайла сегьерар.
Кьакьан, шумал тандал вичин гьейран яз
Дамахар гваз килигда ам, фелек хьиз.
Акуртlани къе гьал вичин залан яз,
Пака къавах мадни жеда безек хьиз.
И кар акваз зани, т1имил пехил яз,
Тlебиатдиз фикир гана дикъетдив.
Гьелбетда чаз ахквадач чун жегьил яз,
И аламат ганач хьи чаз кьисметди.
Къавах тар
© Copyright: Магомед Мирзоев Мирзой, 2020
Свидетельство о публикации №120011409222
Свидетельство о публикации №120011409222
Рецензии