Зи баде

Вахтар жеда зи фикирриз
Хуькведа к/вал бадедин.
Кьуру-кьуд цал, са цла дуьз
Къул авай гьа вадедин.

Ирид  йис тир зи а ч/авуз
Под-классдиз фидайла.
Гьазурна бадеди заз гуз
Ч/ем алай фу гъидайла.

Тадиз неъ , ч/ем тахьуй жими
Бала гьалал хьурай ваз!
Са теменни гудай чими,
Чапла гъилив гардан кьаз.

Вахтар жеда зи япара
Гьат хъийидай адан сес
Жими хуьрек тваз къапара
Хабар кьадай , хьанан бес?

Шотландкадин перем алаз
Эцигнавай цвел-хуьлел.
Адахъ зунни жедай галаз,
Хуьдай за вири рек/ел.

Кьурана хам хъипи тир тав ,
Гъилин зайиф туп/арин
Агуд хъийиз сад-муькуьдав
Ц/ай хъийидай куп/арин.

Маша гъиле мур-мур ийиз,
Руьхъ ийидай к/усаркай
Заз ак/ жедай , зи бадедиз
Хъел авайд хьиз цук/аркай.

Сун куьлуьтрин кух ял тежез
К/ениз ягъай хпен хам.
Яваш-яваш камар вегьез ,
Къекъведай гваз вичин гъам.

Са т/имил дак/ун квай к/вачел
Гьалдардай гагь ругъвалар .
Тамашдай зун чиниз эвел
Ахпа гудай суалар.....

Баде лагь, себеб вуч я хьун
Ви чина а биришар?
Ругъвалривай жегьилриз вун
Жедач жал, хам дегишар?

Биришар туш, рик/ин т/алри
Леке авур гелер я.
Рехъ ийиз чпиз ст/алри
Зи чинал кьур хуьлер я.

Хъуьренай зу , гъилер зурзаз
И жабаб заз гайила.
Адан мана чир хьана заз
Закай баде хьайила.