Явунлар

Яш олтуруп тилей,кёкге къол чююп:
"Халкъ къырыла, топ гюллелер тёгюлюп.
Я, Аллагьым, кёкден гюлле явмасын,
Ана-бала юреклерин ярмасын!
Я,Аллагьым,сакъла оьлюм явундан!
Оьзек оьсмей, гююк къалды бавумдан,
Ол явундан топурагъым пайдасыз,
Шончакъы да къысматыбыз талайсыз…"



Геч, Аллагьым, биз Женнетде яшайбыз,
Гюнде нече тюрлю ашлар ашайбыз,
Шатлы кюйде байрамланы кютебиз,
Шолай гьалда яшавгъа кант этебиз…
Кантыбыз кёп, гьар гюн, не зат болса да,
Явмай, не де явуп тёгюп къойса да,
Кёкге къарап, къайнашабыз булутгъа,
Явдурар деп ери къалмай умутгъа.
Къой, явмасын, буюргъанны гёрейик,
Емиш "явса" , бутакъланы тирейик.
Дав болмасын, кёкден топлар тюшмесин,
Гюлле отдан санларыбыз бишмесин!!!



Ахшам болса, бол эртен, деп сююнюп,
Ананг излеп, оькюрмейсен тююнюп.
Юрек къатгъан, къалгъан кюрчю таш йимик,
Чангдан тапгъан къатты гесек аш йимик…
Авгъан уьйню таш орунда олтуруп,
Къызгъанч гёзьяш таш ястугъунг толтуруп,
Ач къурсакъны кюйлерине чув бермей,
Юхла, бала.Уян эртен...Сав...Оьлмей!

21.02.2018год.