Акьахнава дагъдиз кьакьан,
Кьунвай а чан хиреривди...
Лап дердерик хкуьриз къван,
Ац1уриз рик1 шимеривди...
*
Ц1айлапанар чанда гьатиз,
Къене цlу акl ялавзава...
Т1урфан хьана, руьгьда аваз,
Рик1ин селлер авахьзава...
*
Я бахтавар ирид к1валин,
Шумуд рак1ар хкудда на..?
Дад чир хьайла а ви сивин,
Лагь- магь хьана амукьда гьа..?
*
Беневшайрин арадавай,
Ц1арц1ар гузвай са нур туш зун...
Я цуьк туш зун ваз к1анзавай,
Экъеч1навай юкьвал тамун.
*
Храз хвейи гамун гъалар,
Мурс элкъвена барбат1 хьана...
Ганачирт1а кайи хабар,
Амукьдачир жигер кана...
*
Гьикьван за ваз кхьейт1ани,
Ви вил маса патахъ гала...
Югъди-йифди шехьайт1ани,
Ваз ван жезвач, я чан бала...
*
Лувар т1арам кьуна рекье,
Вуч уьзягъдиз физва гила.
Амазмачни ваз зун виле,
Цифер галай патахъ фирла?
*
Хьанват1ани, зун ваз кьуьзуь!
Рик1елай зун алуд мийир...
Т1арнат1ани къе рик1 на зи!
Кхьизва за гьа ик1 шиир...
Рик1ин дердияр
© Copyright: Назиль Махмуд 76, 2019
Свидетельство о публикации №119110403337
Свидетельство о публикации №119110403337
Рецензии