К1алъай авар мац1алъ, нуж маг1арулал,
Маг1арул мац1алъул сас дагьлъун бугин!
К1алъай рахьдал мац1алъ, г1ун бач1улеб г1ел,
Миллат г1адада хун х1ут1изе
гурин!...
Ибрагьим Х1ажияс Надир Шагьасде,
Маг1арул мац1алда кагъат бит1араб.
Гьеб ц1алун халкъалъул къвак1и бич1ч1идал,
Боялги хадур ц1ан вач1аралъ арав...
Шамил Имамасги нилъее тараб,
Гьесул ирсилазги лъийго хисич1еб.
Нилъерго г1одоб тун, чияр борхани,
Рукъалъ къабих1азул къиматин холеб.
Къавулъа къват1ибе мали унелъул,
Лъил мац1 к1одо гьабун ваг1за ц1алилеб?
Хабалъ чиги вукъун т1ад руссунелъул,
Чияр каламалъищ дуг1а гьабилеб?
Ц1але, Маг1арулал, муг1рузул тарих,
Маг1арул мац1алъул гьуинлъи лъазе.
Бице наслабазе, цере аразул,
Хадусел г1елазги рек1елъ ц1унизе.
Эбелалъ каранда лъимер къарабго,
Ах1е гьелъий назму рахьдал мац1алда.
Т1оцебесеб гали бахъулеб мехалъ,
Дир бах1арчийилан ах1е инсуца...
Рахьдал мац1
© Copyright: Сафи Сулим, 2019
Свидетельство о публикации №119100603298
Свидетельство о публикации №119100603298
Рецензии