Са вун хьиз жемир...

Пуд гаф тир лагьайди.Туькьуьн тавуна,
Вакай къази хьана , дуван авуна.
ГьалчIай хьиз михьи,рагъ авай къуз цав,
АтIугъна  сума,дегиш хьана нав.
Вилеркай хкатна, цIайлапан хьана,
Ахкурди заз анжах ви дабан хьана.

Эхирдалди дигмиш тахьай гуьруьшди,
Дад туна зи сиве туькьуьл емишдин.

Ви чанда авайди  фурс-дамах тир кьван,
ЧIехи руш бубадин, вун кстах тир кьван !
Ваз мукьва са касдин сивяй хьана ван,
Авур кардал вунни хьанвалда пашман.
Лугьузвай, гила тIуб кьазвалда сара.
КьатI жеда, сас сарал илисмир пара !

Вун я вун, авурди тIветIрекай деве,
Зи гъвечIи тахсирни кьазва за хиве.

Къана чи араяр, гьакI физва йикъар,
Туькьуьниз чинеба кьагьардин накъвар.
Эвериз тухузва рикIин гьарайди,
Секин кьил ханва зи сабур-кьарайдин.
МикьнатIис хьиз гелкъвез квахьай бахтунихъ,
Умуд ква садра кьван гьалтна ахкунихъ.

Са вун хьиз жемир ваз, зунни пашман я,
Тахсиркар, зун зи садлагьай душман я !