***

ЛАЦУ   ДАГЪЛАР

Ц1век1-сам галай кирпичдин  к1вал.               
Аруш  алай  кьвед-кьве дак1ар.
Игис  хьанва к1валихъ багъ, сал.                ,
Вилик  гала лалу* дагълар.

Кьвед-кьве дак1ар фрягь ахъа,
Михьивал я вили цава.               
Пакам кьиляй килигдай за,               
Вал тир виляй  кьару, дагълар.
               
Хъуьтуьл юзаз дак1ард шуьше,               
На лугьун гузва адаз мезе.
Лепеда тваз ипек  перде,
Къугъурзава гару, дагълар.               

Ракъинин пай - пакаман нур,
Тандални ви  гъизва абур,
Иердиз  алук1на акур               
Гинибаш  я  яру,  дагълар.

Цифер жедай ви чинал гьай,
Кьибле, кефердикай атай.
Дак1анда заз к1алуб кьац1ай.
Къалурзава кьалу, дагълар

Кьулан вац1ун шакъайрин ван
Гагь кьезил, гагь жедай залан.               
На ягъзавай макьам тир  кьван,
Япара ама, хару  дагълар!

Карагзама гьар са  легьзе…      
Вучда, гьар суз жедай рекье…               
Халкь пайнавай часпарди къе
Эцигнава пару, дагълар

Гагь-гагьни къвез жувакай хъел ,               
Хайи к1вал-муг хквез рик1ел…
Вучиз туна акьван гуьзел
За, зи арха-далу дагълар?!

Уьмуьр  фейи зи чиг-жегьил
Макандихъ цигел я кьве вил.
Арандава  Фикрет  агьил,
Яргъай акваз лацу дагълар.


*Лалу(нугъатдин гаф) – гуьркем авай(видный)