ИМ СА ТАРС
Белки вун йифериз гъетер гьисабиз,
Фикириз аматIа ахвар атIана,
Амма геж я гила, рикIерал хкиз,
Азабар чIугунар, гьижран кьатIана…
Мурадрин алемдин ракIарар кIевна,-
Гила чIалахъ туш зун ичIивилерихъ.
Девирдин гатунар кьисмет хьиз хевна,
Мад цIигел хъжедач зун а вилерихъ.
Амукьай хиялар кIватIна за вири
Тунва чара кIвале, тIапIар агална…
Иливиз жезвач хьи завай са тахсир,-
Жува жув алцурун вахъ яб акална.
Гила за уьмуьрда валай яргъара,
РикIи лап гъалапIрай ругьдик къал кутаз,
Умудар рекьида - амани чара?
Ви тIварни къадач мад -тарс хьана им заз…
© Copyright: Билал Адилов, 2019
Свидетельство о публикации №119060304097
Свидетельство о публикации №119060304097
Рецензии