***

Ц1УРУ  ХУЬР

Атанва зун, вил кваз, ц1игел кьезилриз.
Я к1вал амач, я тар амач, рат ама.
Яд амачиз, ич1и  я пик1 булахдин.
Адан абур, хъиткьерри кьур,  лат ама.

Ч1ур акъатна кучуд хьанва бинеяр,
Сад муькуьдлай аск1ан, кьакьан кьант1ар я.
Женгера хьана т1ебиатдин феслияр.               
Гьа хьалисан сенгерризини  ухшар я!

Кьуд цал ама,  кьакьанвилин я къад ч1иб,
Кьве асирдин уьмуьр акур миск1индин.
Харап1айрин иеси тир рагъул т1иб,
Кьве вил мич1на, текилдалла парудин.

Гар къекъвезва  серк1вед гап1ал туьмериз.
Хуьруьн хуру къалгъанарин ник хьанва.
Кимин рекъин са пад амач, тахьай хьиз,
Уьц1енава, кьвалаз ухшар тик хьанва.

Гарарикай, марфарикай, селдикай
Рузана, са шумуд кьеч1ем - гел тунва.               
Бизар хьана, цифед  къукърум – шелдикай,
Ат1угъай чин, биришри кьур пел тунва.               

Къекъвена  зун,  инал, анал жез акъваз,               
Гуьт1уь куьчеяр, елкъвей кк1ар рик1ел гъиз.
Герен-герен къалгъанарин ак1из цаз.
Туькьуьл серк1верин  ял-нидкай зегьле физ.

Баят гьалди цирг-зуз  туна зи чанда.
Ц1урувални амукдач и,  акур заз.
Аманат хьиз зат1ни амач ви танда.
Хъфизва зун гевил сефил, сугъул яз.

2016. 08.