Фитнечи

Явашдаказ дак1арар накь гатана,
Геж хьунувди, кlвализ са кас атана:
Адет тирвал, суфра чилел вегьена,
Ширин-ширин ийиз хьана хабарар.

Мугьман кlвализ атунивди шад хьана,
Хуш жуьредин хабаррикай дад гана,
Акьуллу инсан акунив яд хьана,
Ахъай хьана хазинадин дапlарар.

Жегьил к1елен ягълу, таза дулмаяр,
Са синида ац1урна къавурмаяр,
Яр емишни салат-малат, хурмаяр,
Мадни атана ц1ус авахьиз афарар.

Заз акунай и дугъри кас масан яз,
Атанвай ам кагьул течиз, мугьман яз.
Вичизни за яб гузавай гьейран яз:
Авахьзавай лезет ширин гафарай.

Чун са кьадар ацукьнавай хъсандиз,
Ахпа фена эхтилатар ямандиз,
Мягьтел хьана, зурз атана зи чандиз:
Заз акуна мугьмандив гвай тапарар.

Кьиляй кьилиз лагълагъариз арачи,
Къуншидикай рахаз хьана къарачи,
Экв жедалди гукьванач и къабачи.
Куз-куз иви звал авай зи дамарра.

Къуншидал кьар элкъуьрна, гил тамаш хьи,
Сагърай лугьуз,  хъфена ам явашдиз,
Уьзягъдаказ пакад физ и кlамашди
Къуншидин гил гатаз хьана дакlарар.

Ам гьамиша ава алчах тир геле,
Угърашдаказ уьмуьр тхуз са гьялле.
Буюр лугьуз ахьтинбуруз чун кlвале
Ацукьнава, эхизва и амалар.