Яру хъуьхъвер алай руш,
Дидедин рик1 Хадижа.
Лезги дагъдин гуьрчек къуш,
Гьикьван вун чан надинж я.
Вилер ч1улав цип1иц1ар,
Багьабур я къашар хьиз
Тамай к1ват1ай ц1ириц1ар,
Хкваш вуна чаз к1вализ.
Цавар- чилер, талгьуз вун,
Фарфалаг хьиз элкъведа.
Ат1ана на кацин тум,
Гила гьик1 ам экъведа?
Машмаш хьтин хъуьтуьл руш,
Гъиле авай шеъ гудай.
Ваз садахъай кич1е туш,
Ялавди хьиз чин кудай.
Азиз бала, масан руш,
Ша захъ галаз суьгьбета.
Лезги чилин вик1егь къуш,
Ч1ехибуруз гьуьрмета!
Яру хъуьхъвер алай руш
© Copyright: Назиль Махмуд 76, 2019
Свидетельство о публикации №119022109600
Свидетельство о публикации №119022109600
Рецензии