ГЬИНИЗ ТУХВАНА?
Рагъ мад акъатзамач, гьахьна цифериз,
Йикъар ухшар хьанва хъуьтIуьн йифериз,
ЧIагъари кьид гузва сефил лифериз,
Чарчар авахьзамач, булах кьурана,
Лагь, вуна зи гьиссер гьиниз тухвана?
.
Къакъатун хьана жал гила эрзиман…
Себебар талгьана, фена эркиван,-
Япара гьатнава а камарин ван…
ЭчIелрай кьунани - михьиз чухвана,
Лагь, вуна зи гьиссер гьиниз тухвана?
.
Вун тушни гъайиди гатфарин шагьвар,
Дуьзенриз гайиди суварин навар,
Ингье, секин яни- шехьзава цавар,
Явашдиз цIаярик кутаз хъухъвана,
Лагь, вуна зи гьиссер гьиниз тухвана?
.
Туна вач рикIе гъам, дагълар кьван чIехи,
Зун анихъ...дердерин кьил жезва рехи…
Фикир мад вакай я: жедатIа эхиз?
Нурарал саврухрин паяр ракъана,
Лагь, вуна зи гьиссер гьиниз тухвана?
Б.А. 2020.
Гьиниз тухвана...
© Copyright: Билал Адилов, 2019
Свидетельство о публикации №119021503916
Свидетельство о публикации №119021503916
Рецензии