Iуйренца кхета дошо малх санна,
Хоза ба, лепаш ба вай Нана-Мохк.
ЙIовхал луш вайна, кхоцаеш, денна,
Вахара хIара ди цо гIоза доакх.
(тIехьа оалар):
Хьо яха, яха, ва Нана-Даьхе!
Ма мерза детталу хьоца тха дог.
Дац укх лаьттан тIа кхы хьолла маьхе.
Хьо аьнна лувз оаха тхой маьрша ког.
Яхийла, екийла, ва Нана-Даьхе!
Бахалба, латталба хьамсара мохк –
Тха Даьхе…
Хьо тоалуш латта денгара енна –
Хьа кхашка беркате ялаташ кхув.
Далла хоастам беш, хьо тхоашта бенна,
Хьа сийле хьалкхоабаш тхох хIара лув.
(тIехьа оалар):
Хьо яха, яха, ва Нана-Даьхе!
Ма мерза детталу хьоца тха дог.
Дац укх лаьттан тIа кхы хьолла маьхе.
Хьо аьнна лувз оаха тхой маьрша ког.
Яхийла, екийла, ва Нана-Даьхе!
Бахалба, латталба хьамсара мохк –
Тха Даьхе…
30.0I.I9.
Нана-Даьхе. илли
© Copyright: Аслан Куазо Ингушетия, 2019
Свидетельство о публикации №119020500451
Свидетельство о публикации №119020500451
Рецензии