Шавгьар

-Дугъри вуч я?-хабар кьуна
Муалимди тарсуна.
-За къуншидин дак1ар хъуна!-
Жаваб гана Мансура.

Къарагъна руш,-За дидедиз
Куьмекна, кlвал шуткуна!
-За яд гъана къе эмедиз!
-За квахьай кlел ахкуна!

Мадни са руш къарагъ хьана,
Регъуьдаказ рахана,
-Къунши баде начагъ хьанвай,
За адан гам храна!

Гьарда вичин тариф ийиз,
Дамахар гваз рахазвай.
Киснавай са аял зайиф,
Перишан яз  аквазвай.

-Къарагъ гада, ахъая чаз
Вучиз къе вун киснава?
Тlазвай чка авани ваз?
Белки къе ваз писзава?

Дертлу аял виниз хьана
Гужуналди рахана.
Ахпа яваш агъуз хьана,
Шалварди кек къалана.

Куьчедаллай киц1и еке,
Делида хьиз кьас гана,
Жакьвана зи шалвард кикер,
Куьмекдай са кас хьанач.

Къе алукlай цlийи шалвар,
Гьайиф я заз, кук1варна.
-Кич1е жемир, я хва, Шавгьар,-
Малимди ам кинарна.

И арада, рак гатана
Кьуьзи са паб атана.
Шавгьаран ам патав фена,
Темен гана, лагьана:

-Азиз бала, алани хер?
Шалвардикай фикирмир,
Хьайитlани бижгъер-бижгъер,
Жуван рикlиз таъсирмир.

Цlуд къахчуда бадеди ваз,
Кичle жемир къалдикай.
Пуд йисавай балади заз
Хабарна и гьалдикай.

Хкадарна са вагьшиди
Куьчедавай баладал.
Хъсан хьана ам къуншидиз
Акуна и арада.

Кичl рикlелай фейи Шавгьар
Къвазна вилик баладин.
Асландиз вич хьанвай ухшар:
Дирибаш хва бубадин!

Сифтедай лап кlеве хьана:
Алтугна кицl кьас ягъиз.
Ахпа Шавгьар цеве хьана,
Алчах кцlин тарс ягъиз.

Вирибуруз хабар ава,
Киц1ни тир са зурбади.
Ихьтин кьегьал, гьунар авай,
Дамах я вун бубадин!

Ачух хьана аялдин чин,
Кич1евални ахлатна.
-Чан зи бала, ваз  аферин,-
Лугьуз, къари ахладна.

-Кьегьал Шавгьар!-
Лугьуз вири
Аяларни сад хьана!
Муалимди,
-Ингье дугъри!
Шагьваразни шад хьана!