КТАБ ГВА ЗАВ
Гьикьван ч1ав я, шумуд йисар,
Лап са гъвечIи ктаб гва зав.
Налугьуди дуьня ацIай
Эвер, гьарай, азаб гва зав,
ЧIехи сабур, са таб гва зав.
Чаз аманат гуьгьуьл гва зав,
Лезги чIалал дерт рахазва.
Дуьнядикай, уьмуьрдикай
Гагь ширин, гагь перт рахазва,
Гагь секин, гагь серт рахазва.
Ктаб гва зав, акI я хьи заз,
Ялав гва зав туькъуьн тийир.
И ялавдин гур экуьник
ТуькIуьрзава зани шиир,
Эй чи элдин ккани шаир...
98.
Заз дерт рахух, гъамаркай лагь жедатIа,
Эмина хьиз дерт ахъая къелемдив.
Гьейранара, цаварал твах жедатIа,
И бахтавар рикI ацIура элемдив.
Жедан вавай? Эмин михьи нагъв я са,
Авахьнавай лезги элдин вилелай.
Эмин нур квай, рекIв-рекIв гузвай рагъ я са,
Рехъ къалузвай чи шиирдиз кьилелай.
16.03.99
Етим Эминаз
© Copyright: Римма Гаджимурадова, 2019
Свидетельство о публикации №119010402192
Свидетельство о публикации №119010402192
Рецензии