Ялгъуз тар

Ялгъуз авай муьтквер таран серинрик
Ацукьнай зун, рик1е фикир, гъам аваз.
Акунай заз адан гьалар четиндиз,
Зазни к1ани са гъвеч1и мелгьям авай.

Минетариз, къвезва кьилив мугьманар,
Умудар гваз, ашукь хьана тегьердал.
Т1алаб ийиз гьар жуьредин дарманар.
Гагь шехь ийиз, сефилдаказ эверда.

Хвеш к1евириз гьар жуьредин к1усарив,
Чпин гунагь вигьизва и бендедал.
Белки адаз и саягъдин гъуцари
Пай ганава, гьа и залан вядеда.

Атирар гвай, гьар жуьредин цуькверин
Кьулавай тар фикир мийир даим хьиз.
Яргъарилай сес атайла нуьк1верин.
Акуна заз ялгъуз тар са етим хьиз.

Гагь кьат1узва за мадни ам муъмин хьиз:
П1ир хьана хьиз вич виридан рик1ева.
Зунни инал акъатнава йигиндиз-
Зи кьисметни, белки адан гъилева.

Зикри ийиз, туьмерзава за тандиз,
Бахтуникай, камалдикай бине кьаз.
Ухшар я тар лап михьи тир инсандиз,
Чарадан т1ал жувандалай вине кьаз.

Белки зи сир залан ят1а хилериз-
Тахьайла ам вучиз икьван сефил я?
Язух ч1угваз къвазнава зун, кинериз-
Белки зи дерт адандалай кьезил я.

Амма чна фикир гайт1а хъсандиз,
Саваб крар виридалай хийир я!
И таразни ганва кьисмет инсандин:
Мез авачиз, Регьимлудан есир я!