Ингье,шегьердин йиф…кьуд пад я эквер,
Ина гьар инсандин кIвачик гала звер,
Ина гьар са ванцик ван какахьнава,
Нефес къачуз жезвач ,залан я гьава.
Сад кефи кIубан яз кIвализ хъфизва,
Садни дердерилай яман ифизва,
Гьеле ахъаз ама базар, ресторан,-
Ялар ягъаз ава кьуьзуьди жаван…
Амма лап яргъара, са дагъдин хуьре
Къе йиф акъатзава вичиз хас жуьре,
Ана цавун гъетер мукьвал я, мукьвал,
Ана варз экуь я дагъларин кукIвал.
Куьчейра кас амач, секин я кьуд пад,
Амма са дакIардай ванер къвезва шад,
Ана къе мел ава- рушар кIватI хьана,
КIвалахиз сад садан гуьгьуьл тахана.
Вилик рекъер гала, кьве патахъни- сар,
Садани кагьулвал ийизвач са чIар,
Хуьруьн манидарар атанва иниз,
ЧIагъандин авазар физва алахьиз…
…Эгь, им шегьердин йиф…кьуд пад я эквер,
Ина гьар инсандин кIвачик гала звер,
Ина уьмуьрдилай ятIани рази,
Вучиз вил галатIа хуьруьн йифехъ зи?
КЬВЕ ЙИФ
© Copyright: Билал Адилов, 2018
Свидетельство о публикации №118121005355
Свидетельство о публикации №118121005355
Рецензии