Зуьгьре гъед

 М.Ю.Лермонтоваз*

Югъ рагъдандихъ элкъвей вахт,
Белки уях хьана бахт.
Зи эрзиман-мурад хьиз,
Муьгьуьбатдин тIаратI хьиз,
Зун уьмуьрдин шегьредал,
Расал хьана Зуьгьредал.

Малайикдин къилихар,
Квачир зерре синихар,
Вич дуьдгъвердин цуьк хьтин,
Къене авай рикI хьтин,
Зун чинебан сегьнеда,
Кьару хьана Зуьгьредал.

ЧIиж хьиз элкъвез цуькведал,
ТIарар хьанвай мижедал,
Чепелукь хьиз лампадал,
Йиф экв ийиз пакадал,
АвайтIа чи магьледа,
Зун элкъведай Зуьгьредал.

Гьардаз вичин гъед ава
Лугьуда, экв гуз цава.
Зи гъед ала и чилел,
Зун ашукь хьанвай вичел.
Зи кьисметдин чIередал,
КуькIвенвай гъед-Зуьгьредал.

Геж хьанатIан чи гатфар,
"ЗАЗ ВУН КIАН Я," и гафар,
Пехилбурун хъилери,
Мидяайрин  гъилери,
Мез атIайтIан дегьредал,
Агакьарда Зуьгьредал !

*Урус шаир М.Ю.Лермонтов Тифлисдай Къубадиз атай вахтунда(1837й.) ам неинки Къубада,гьакI ЦIийи Къубадани(Къусарда) хьана  Къусарда ам военный духтур подполковник  Александр Александрович Маршеван кIвале хьана…
Духтур Маршеван къунши лезги Къурбаназ Зуьгьре тIвар алай са тIарам руш авай, шаир адан гьакьекьдин(агат) вилерал кьару хьанай,амма дагъвийрин адетрихъай вил къяна адавай вичин рик1ин гьиссер винел акъудиз тахьана Зуьгьредивай къакъатнай.
Урусрин бажарагълу шаирдинни лезги руш Зуьгьредин муьгьубат, абурун пак гьиссер фикирда аваз кхьей шиир.