Рагъ хьуй квекай...

Чlимел юкъуз, агь, ракъинихъ зи вил хьайила,
Зулун цавайни зи къеняй селлер къвайила,
Эцигда за хъипи пешер марфадкай гъана:
Рикl секинра, рагъ хьуй квекай! - абруз лагьана...

Белки, пешер, куь экуьвал дидедин рик1 я,
Т1алабзавай дат1ана заз - бахтунин цуьк я,
Тикрарзавай гьар легьзеда хъипи харадиз:
Рикl секинра, рагъ хьуй квекай! – багьа баладиз.

Белки салам я дустарлай  къе к1ват1ай эквер,
Я гарукай, я къаюкай гьич кич1е тежер, -
Аян хьана жал багърийриз, гьалдикай хабар?
Рикl секинра, рагъ хьуй квекай! - пешерал ц1арар….

Югъди-йифди авай рик1е зи ярдин гафар,
Хиялралди вугана заз рекье тур чарар,
Белки ят1а, хъипи пешер, куьн - гарал элкъвей:
Рикl секинра, рагъ хьуй квекай! – ада заз кхьей.

Белки Илгьамдин булахдал  гуьруьшдиз атай,
Лифер я куьн зи гьиссерин алемда авай,-
Диде, дустар, зи к1аниди  кутур луварик -
Рик1 секинра, рагъ хьуй квекай! – зулун тарарик.

14.10.2018

фото из моего архива