Йиф фад акъатда

Канивал ялав я ,саврухрив  ганвай,
Гьиссерин цIелхемар -рикIиз ракъанвай…
Зайифди туьхуьда, гурди цIай жеда
Белки зи бахтуна ихьтин   пай жеда?

Яргъа аватIани , ам   гала патав,
Гекъигиз жедатIа  Эсли-Керем чав?
Гъанва  и савдади зи руьгьдиз илгьам,
Валлагь, дилидаз хьиз кан хьанва заз ам!

Гьиниз фейитIани ам  гала вилик,
Зи гьар са хиялда ам  гала кьилик,
Ракъини, марфади кьазва  тIвар адан-
Дуьня са легьзеда жезва авадан!

Зи рикIел са лишан эцигна ада-
Белкини фикирна- аманат тада?
Са югъни акъудна икI вил- вилеваз,
Бахтавар хьана чун ашкъи  кьилеваз.

Амма мад няни..мадни чаравал,
Мадни мичIи цифер ала чи цавал,
Агатна мадни чав лугьуз тежер гъам,
ЖакIумра  гьатнава  гьижрандин макьам.

Акатна чандик фул  , нагагь атана,
Вучин- гьикIин лугьуз чара атIана.
Эй дуьня, им яни ви адалат, гьахъ,
Зи кьил акъатзавач - вуч хьанатIа чахъ?

Чуьнуьхиз алахъиз нагъв алай вилер,
Чуькьузвай мад ада  юзазвай гъилер…
КIелна зи руьгьдавай « чун гьикI къакъатда?»
Теселли гана заз:  йиф фад акъатда…