Руьгьдин гьарай

Экуьн кьил.. гьарфарал юзазва гъилер,
АлкIанва экрандал перишан вилер…

-Салам, чан, вун гьинва, вуна вучзава?
ГьикI ятIа, лагь на заз, ви ругьдин гьава,
Лагь вун гьикI ксана, гьикI къарагънатIа,
Ацукьун, къарагъун, кеспи гьикI ятIа.


-Азизди, масанди, гьикI жеда зун, гьикI,
Вавай къакъатна накь - пад хьана зи рикI!
Вуч хъсан , вуч хъсан - вун фад атана,
Вахъ дарих хьанвайдан гьалар кьатIана…


- Зи руьгьда- тIурфанар, саврухар, гарар,
Са рикI кьве рикI хьанва –авачиз къарар,
Яргъал тир мензилар- легьзе чун патал,
Вучиз геж гьалтнатIа чун икI сад садал?

-Мал-девлет кандачир-вири ганайтIан,
Тек са вун зи патав даим хьанайтIа!
Заз я йиф ,югъ амач, мичIи я кьуд пад,
Тек вуна кхьейла и руьгь жезва шад…

-Дарих яз тадач вун , дарих жез тадач,
Ашкъидин шербетдик къарих жез тадач!
Даим зи виликай карагзава вун,
Эй зи вилерин нур, зи рик1ин ягъун!

-Жузазва вирида- вуч хьанва руш вахъ?
Авач заз жавабар -гьим гьахъ, гьим нагьахъ…
Азизди, минет хьуй ,хуьх жув на к1евиз,-
Ахварар акуна вакай заз сенфиз…

- Вучиз чун сад - садаз гила чир хьана,
Вучиз чун ашкъиди икьван геж кана?
Тек са вун- зи чанда, рикIе авайди!
Вун я зи ашкъидин рекье авайди!


-Азизди, амма за ахъайин са сир,
Гъил къачу, алакьнач, лугьуз хьаначир,
Каниди, вун сагърай , авач чаз чара,-
Зун кьенва, захъ галаз гьахьмир вун сура…