Про даргинский язык

Дигахъис наб дарган мез

Ну дарган дубурланра,
Дубуртазир ак1убси,
Аллагьла ахъриличил
Дунъя, ват1ан дагьурси.

Ну дарган дубурланра,
Дарган мезлчи карц1си,
Нешла мезличи диги
Ниъличил дарх дерхъибси.

Алк1укад ак1убси сар
Дарган мезличи диги,
Ак1убла иштях1сира
Гьарил дарган девличи.

Дигахъис наб дарган мез
Г1ямарла Батирайла,
Дигахъис наб дила мез
Халкьла поэт Сулайба.

Илдани шалабиру
Ц1ябдешлизиб наб гьуни,
Дарган мезли шадбиру
Урк1и, ну пашманх1ели.

Х1ейгахъес вирару мез
Г1ях1мадха ва Рашидла,
Илдани машгьурбариб
Дагъиста урк1и-Дарга.

Девла машгьур устнала,
Пергер далайчибала
Улкала гьар г1ямзилар
Мез зайбик1аб мурталра.

Чум лугъат лердиалра,
Район ва ши диалра,
Пагьмукар даргантала
Мез далути бахъбааб.

Дигахъис наб дила мез,
Бег1тачирад даибти,
Я диги ках1едурхар
Лералцадх1и миц1ирли.

Дарган мез дагьахъурси
Нешлис азир баркалла,
Ну дарган риъниличи
Пахрура ках1ебурхар.