ГЬИНА ЯТIА ПАКУДА...
Хайи хуьруьн жигъирар,
Куьн вуч секин, секин я.
Гьина ятIа Пакуда
Рекьер къайнар, йигин я.
Чи бубайри лугьудай:
"Са яц гана ам аку!"
Яц квачизни виридаз
Аквазва къе вун, Паку.
Чаз акI тир хьи, Паку, на
ЧIехи бахтар пайзава.
Гзафбуру ви хурал,
Уьмуьрар гьакI зайзавай.
Чун атанвай хуьрерай
Лувар галай къуш хьана.
Виняй агъуз килигиз,
Чаз лугьудай "чушка" на.
А чIавуз чун , Паку, ви
Гьейран хьанай экверал.
Къвекъвенай ви куьчейра,
Гьяркьуь, генг тир рекьера.
Ухшар тушир и рекьер
Лезги хуьруьн жигъирриз.
Гьарай тунвай машинар,
Ухшар тушир нехирриз.
Агь, вил ама гилани
Бони М.-дин, АББА-дин
Шикил алай перемра...
Пул гумачир бубадив...
Хайи хуьруьн жигъирар,
Куьн вуч иер, секин я.
Гьина ятIа Пакуда,
Рекьер къайнар,йигин я...
11.09.1999.
гьина ят1а Бакуда...
© Copyright: Римма Гаджимурадова, 2018
Свидетельство о публикации №118081403809
Свидетельство о публикации №118081403809
Рецензии