Лезги "Булах"- зи руьгь, бахт я,
Ст1алар михьи.
Шииратдин дамах, тахт я,
Дустар, куьн гайи.
Зи к1валин рак квез ахъа я,
Мус атайт1ани.
Вири сад хьиз заз багьа я,
Вуч лагьайт1ани.
Куьн патал гьич къведач гьайиф
Захъ авай гьар зат1
Хьайит1ани зун лап зайиф,
Дегишардач хат1.
Чин ачухдиз кьабулда куьн
Югъ-йиф талгьана.
Чи мукьвавални дуствал хуьн
К1ан я дат1ана.
Михьда за "Булахдин" чешме
Шегьре хьуй лугьуз
Чи жегьилриз жеда чешне
Дуьз камар къачуз.
Океандиз ам элкъуьрай
Алай аямда.
Илгьамдин лепе къекъуьрай -
Чи гьар макъамда.
Бахтлу кьисметдин хел хьана,
Къуьн-къуьне аваз,
"Булах" фирай са сел хьана,
Куьн, дустар, галаз..
Булах к1ват1алдин иштиракчийриз
© Copyright: Гасанова Гюзеля, 2018
Свидетельство о публикации №118060205092
Свидетельство о публикации №118060205092
Рецензии