Расул гамзатов ялгъузвал одиночество

РАСУЛ ГАМЗАТОВ
ЯЛГЪУЗВАЛ (ОДИНОЧЕСТВО)

Къадпи аьср ккудубк1ура.
Саб биц1и ялсана – хътубт1иди хут1.
Хъа узу сар дийигъназа гъаравулси
узу гьюдюхрур гъюр к1ури ккилигурайирси.

Кабхьри кт1убшвурайи аквси
дюнья хътубгура гизаф кьадар инсанар алди.
Амма узу сар, хут1лиъ гьархнайи шалси
аза дийигъну чвлин мархьликк ялгъузди.

Чюлиъ саб гьарси, чру бархат али,
мик1арин гюлйири урхъар кидирчнайи
кьяни духьназа гьерхбан ишараси
гьякь жаваб дибрихъди дийибгънайи.

Ва абйирин накьварихьан гъирагъдиъ
дураригъ хъубснайи варит1ан ягъли гъванси
гьерхбан ишараси лик1 духьну дийигъназу
йиз ц1ин мелзарин дих саризра деребхьруси.

Йиз къураматдиъ Робинзонси
гъирагъдиз лигураза шумал дарди.
Аммаки гук1ни шулазу бизонси
йивну гъядап1уз кадабт1найибси.

Жарйирин уьлкйириъ, Раббийиз рябкъюра,
узу думукьан духьнадарзу сархуш.
Гьацира биши залариъра вуза ялгъуз
фици ялгъузди вуш йиз ч1алра авар.

Зат дарди сар вуза, игит эскерси
женгнаъ варидаригъян ч1ивиди гъузнайи.
Узу кьялаъ т1аънайидаригъян гъют1урччвну
ахъунзу батлагъариъ удуч1вуз даршлу.

Зат дарди сар вуза зиян дубхьнайи дурнаси
кьарнийирин ц1арнахъан хъудубгнайи…
Дидиз ухдит1ан кьиблайиз т1ибхуз вахт ву,
хъа гъирмйир курк1найи хлинццар адар хъаъруси.

Хъана вуза ухшар кьабириз дерццнайи узу
Сибирдиз алдауз к1ваълан гьархну гъузу,
Дугъан вари халкь вагъунариъ уржну
Накьвариъ ит1икьуз гъахурайиси йик1уразу.

Уьмрин гъирагъдиин ул’ан идитнайирси алди
адвалианна гьархнайивалиан эргнайирси
узу дийигъназа сарна сарди ялгъузди
я гагвлахъинди, я арчч’влахъинди илт1ит1ик1ди.

Убгъруб артухъ дубхьнайирси гьац1ишварихъан
к1ван аьзиятнаккан ккадрархьрурси,
узу устлихъ, ц1ихъ хъайиси,
деъназа йиз узухъди ялгъузди.

Уж’вал гъалиб дубхьну ккуни кьисматнаъ
аьхиримжи маш дибик1на кабц1ну.
Заълан узуз тувнайи кьалам ккудудубк1ру
фила-вуш дугъубжвруси азуз йиз хилиъ абсну.

Сар вуза тялимси Ахульго дагъдиин али
йишвандин хядарин хабахъ даабхнайи.
Юкьуб тереф душмнар, сану – фужк1ара…
Анжагъ вягьши Кайсу нирин дихарт1ан адар ерхьру.

Аммаки дишла кьяляхъ хът1убччвуру гъалаб кипру гуч1
гъючвюбхну ва дубт1ну гъябгъру уьмрин улхьан.
Узу дардуза сарна сар, узухъди хъазухъ Рабби масан
Сан-гьисаб арду дюньяйиъ ялгъуз гьаммишан.

Марина Ахмедова-Колюбакинайин переводдиан
илт1ибк1найиб вуйиз.