Акур кар туш

Акур кар туш садрани заз и гьалда
Кесиб-несиб къвазун хура гьалалдин.
Архайиндиз ацукьнавай айвандал,
П1ип1 элкъуьриз усур хьайи кавалдин.

Шивди патав гуьц1ай-гуьц1ай, бажагьат,
Немумкин я гьар садакай балк1ан хьун.
Са кардал зун хьанва пара аламат-
Дуьз яни бес инсандикай гьайван хьун?

Мумкин я гагь чир тахьун ар-айибни:
Япар яргъи ламран акьул т1имил я.
Мукъаят я вич вичелди циц1ибни:
Мукъаятвал акьулдин са асил я.

Ч1арч1икайни, чара касдин вилевай,
Гъвар авунни им са бегьем гьунар туш.
Амал авурт1а к1валахдал гъилевай,
Чарадаз ам са ч1авузни бизар туш.

Сагърай инсан намус хуьдай къизил хьиз:
Хиянатдин къилихрикай азад я.
Хуш жеда ам чина авай са вил хьиз:
Ихьтин дустар гьелбетда чи мурад я.

Сивевайди ч1урук1 рахун мумкин я-
Айиб авач, к1араб квачир тике я.
Дуьз рекьевайди гьамиша муъмин я:
Муъминакай рахайт1а - ам къеле я.

Тахсир мийир садра хата хьайиди:
Са-кьве югъ я чаз авайди чилерал.
Туьнбугьни гьик1 авурай бахт хайиди,
Атай ч1авуз шел авахьиз вилерай.

К1амайвилихъ кьадар хьайт1а хъсан я:
Эхир-макъам са аламат акъатдай.
Тахьайт1а мад рекьидалди гьижран я,
Кьейилани ажугъ хъфич гьаятдай.