Насипсизни этер йимик насипли,
Бу агьвалат юреклеге нюр яя:
Атам-анам бир затдан чы сююне,
Бир-бирине къарап эпсиз иржая.
Сююнему абзардагъы къушланы
Макъам согъуп, йыр йырлайгъан кююнден,
Яда буса баласыны баласы
Къулач яйып бийийгенден уьюнде.
Билмесем де йыбанчлыкъны себебин
Насибиме насип къошар мюгьлет бу,
Чечек бавгъа айландырар ёлумну,
Юрегимде даим яшар мюгьлет бу.
Атам-анам шатлыгъындан шаркъ эте,
Бир-бирине къарап эпсиз иржая.
Насипсизни этер йимик насипли
Бу агьвалат юреклеге нюр яя.
Яралгъандай бу гёзеллик, бу насип
Уьюбюзню гюл талагъа ошатма…
Болгъай эдим токътатмагъа дюньяны
Бу мюгьлетни даимликге яшатма.
Атам-анам бир затдан чы сююне…
Бир затдан чы сююне
© Copyright: Нурьяна Арсланова, 2018
Свидетельство о публикации №118032802450
Свидетельство о публикации №118032802450
Рецензии