Орамбашда сени гёзлей
Эки якъны къаратсам да,
Сагъа элтер ёллар излей
Сан-санымны къаралтсам да,
Тегенекли тёбелерден
Яланаякъ айлансам да,
Оьтюп сувдан, отдан, елден,
Сонг шынжыргъа байлансам да,
Къутгъармагъа сен гелер деп
Умут этип йиберсем де,
Сени излеп, сени гёзлеп,
Гёзюм ачып жан берсем де,
Янгызлыкъда ташламайлы
Яныма бир гелмежексен,
Менсиз гюнню гётермейли
Артым булан оьлмежексен,
Оьлмежексен, билемен.
.....
Гертилиги аз дюньядан
Сююв оьтюп гетген жан деп,
Юрегинде сени булан
Ахыратгъа етген жан деп,
Оьмюр бою эсделикни
Оьзюнг булан элтмежексен,
Языкъсынып, къабурума
Бир сама да гелмежексен,
Гелмежексен, билемен.
Гелмежексен
© Copyright: Нурьяна Арсланова, 2018
Свидетельство о публикации №118032802370
Свидетельство о публикации №118032802370
Рецензии